മിയാമി : പ്രീക്വാർട്ടർ മത്സരത്തില് പെനല്റ്റി നഷ്ടമാക്കിയതിലെ നിരാശ തുറന്നു പറഞ്ഞ് അര്ജന്റീന നായകന് ലിയോണല് മെസി. സത്യം പറഞ്ഞാല് ഇത് വലിയൊരു ആശ്വാസമാണ്, ഞങ്ങള്ക്കെല്ലാവർക്കും. ആ പെനല്റ്റി നഷ്ടപ്പെടുത്തിയ രീതിയില് എനിക്ക് എന്നോട് തന്നെ കടുത്ത ദേഷ്യം തോന്നിയിരുന്നു. വളരെ നിർണായകമായ ഒരു നിമിഷത്തില് ഞാൻ എന്റെ സഹതാരങ്ങളെ വഞ്ചിച്ചുവെന്നാണ് എനിക്ക് തോന്നിയത്. ഞാൻ കാരണം ടീം തോല്ക്കുമെന്ന് ഭയന്നു. എന്നാല് ഭാഗ്യവശാല്, ദൈവം എനിക്കായി മത്സരത്തിന്റെ അവസാനത്തില് ഒരു പ്രത്യേക സമ്മാനം കാത്തുവെച്ചിട്ടുണ്ടായിരുന്നു. എനിക്ക് സമനില ഗോള് നേടാൻ കഴിഞ്ഞു. അത് നല്കിയ സന്തോഷം വാക്കുകള്ക്ക് അപ്പുറമാണ്. ഈ ടീം എപ്പോഴും പോരാടുന്നവരാണ്, അവരെ ഒരിക്കലും താഴെയിടില്ല-മെസി പറഞ്ഞു.
മത്സരത്തിന്റെ 79-ാം മിനിറ്റ് വരെ 2-0 ന് പുറകിലായിരുന്ന അർജന്റീന, വെറും 13 മിനിറ്റുകളുടെ ഇടവേളയിലാണ് മൂന്ന് ഗോളുകള് അടിച്ചുകൂട്ടി ലോകത്തെ ഞെട്ടിച്ച നാടകീയ തിരിച്ചുവരവ് നടത്തിയത്. മതരത്തിൻ്റെ അവസാന വിസിൽ മുഴങ്ങിയ ശേഷം വികാരാധീനനായി മെസ്സി മൈതാനത്ത് മുട്ടുകുത്തി കരയുകയായിരുന്നു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
മത്സരത്തിന്റെ 15-ാം മിനിറ്റില് തന്നെ യാസർ ഇബ്രാഹിമിലൂടെ ഈജിപ്ത് അർജന്റീനയെ ഞെട്ടിച്ചിരുന്നു. എന്നാല് തൊട്ടടുത്ത നിമിഷങ്ങളില് നിക്കോളാസ് ടാഗ്ലിയാഫിക്കോയെ ബോക്സില് വീഴ്ത്തിയതിന് അർജന്റീനയ്ക്ക് അനുകൂലമായി പെനാല്റ്റി ലഭിച്ചു. കിക്ക് എടുത്ത മെസിക്ക് പിഴച്ചു. ഈജിപ്ഷ്യൻ ഗോള്കീപ്പർ മോസ്തഫ ഷൊബീർ മെസിയുടെ ഷോട്ട് തട്ടിയകറ്റി. ഇതോടെ ലോകകപ്പ് ചരിത്രത്തില് ഏറ്റവും കൂടുതല് പെനാല്റ്റികള് (ഷൂട്ടൗട്ട് ഒഴികെ) നഷ്ടപ്പെടുത്തുന്ന താരം (4 എണ്ണം) എന്ന മോശം റെക്കോർഡും മെസിയുടെ പേരിലായി. 67-ാം മിനിറ്റില് മുസ്തഫ സിക്കോയിലൂടെ ഈജിപ്ത് രണ്ടാം ഗോളും നേടിയതോടെ ലോക ചാമ്പ്യന്മാർ ടൂർണമെന്റില് നിന്ന് പുറത്തേക്കെന്ന അവസ്ഥയിലായിരുന്നു.
79-ാം മിനിറ്റില് ഡിഫെൻഡർ ക്രിസ്റ്റ്യൻ റൊമേറോ അർജന്റീനയുടെ ആദ്യ ഗോള് നേടി (2-1). ആദ്യ പകുതിയിലെ പാപക്കറ തീർത്ത് 83-ാം മിനിറ്റില് ബോക്സിനുള്ളില് നിന്ന് മെസി അർജന്റീനയ്ക്ക് സമനില നേടിക്കൊടുത്തു (2-2). മത്സരം എക്സ്ട്രാ ടൈമിലേക്ക് നീങ്ങുമെന്ന് കരുതിയിരിക്കെ, എൻസോ ഫെർണാണ്ടസ് നേടിയ ഗോളിലൂടെ അർജന്റീന 3-2 ന്റെ അവിശ്വസനീയ ജയം സ്വന്തമാക്കി. ക്വാർട്ടർ ഫൈനലില് സ്വിറ്റ്സർലൻഡിനെയാണ് അർജന്റീന നേരിടുക.