മഡോണാ ആർട്സ് ആൻഡ് സ്പോർട്സ് ക്ലബ്ബും എസ്.എച്ച് മെഡിക്കൽ സെന്റർ, കോട്ടയവും സംയുക്തമായി സൗജന്യ മെഡിക്കൽ ക്യാമ്പ് സംഘടിപ്പിച്ചു

കുമരകം: മഡോണാ ആർട്സ് ആൻഡ് സ്പോർട്സ് ക്ലബ്ബും എസ്.എച്ച് മെഡിക്കൽ സെന്റർ, കോട്ടയവും സംയുക്തമായി സൗജന്യ മെഡിക്കൽ ക്യാമ്പ് സംഘടിപ്പിച്ചു.
സമൂഹത്തിന്റെ ആരോഗ്യ സംരക്ഷണവും രോഗപ്രതിരോധ ബോധവൽക്കരണവും ലക്ഷ്യമിട്ട് സംഘടിപ്പിച്ച ക്യാമ്പിൽ ജനറൽ മെഡിസിൻ പരിശോധന, രക്തസമ്മർദ്ദം, പ്രമേഹ പരിശോധന, ആരോഗ്യ നിർദേശങ്ങൾ എന്നിവ ഉൾപ്പെടെയുള്ള സേവനങ്ങൾ വിദഗ്ധ ഡോക്ടർമാരുടെ നേതൃത്വത്തിൽ സൗജന്യമായി ലഭ്യമാക്കി. നിരവധി പേർ ക്യാമ്പിൽ പങ്കെടുത്ത് ആരോഗ്യ പരിശോധനകളും ആവശ്യമായ മെഡിക്കൽ നിർദേശങ്ങളും സ്വീകരിച്ചു.
സാമൂഹിക പ്രതിബദ്ധതയ്ക്ക് പ്രാധാന്യം നൽകി ജനങ്ങളുടെ ക്ഷേമത്തിനായി മഡോണാ ആർട്സ് ആൻഡ് സ്പോർട്സ് ക്ലബ് തുടർച്ചയായി നടപ്പാക്കി വരുന്ന പ്രവർത്തനങ്ങളുടെ ഭാഗമായാണ് ഈ മെഡിക്കൽ ക്യാമ്പ് സംഘടിപ്പിച്ചത്. പരിപാടിക്ക് ലഭിച്ച മികച്ച ജനപങ്കാളിത്തവും പിന്തുണയും സംഘാടകർക്ക് കൂടുതൽ പ്രചോദനമായതായി ക്ലബ് ഭാരവാഹികൾ അറിയിച്ചു.
പരിപാടിയുടെ വിജയത്തിനായി സഹകരിച്ച എസ്.എച്ച് മെഡിക്കൽ സെന്ററിലെ ഡോക്ടർമാർക്കും മെഡിക്കൽ സംഘത്തിനും, ക്ലബ് അംഗങ്ങൾക്കും, ക്യാമ്പിൽ പങ്കെടുത്ത മുഴുവൻ നാട്ടുകാർക്കും മഡോണാ ആർട്സ് ആൻഡ് സ്പോർട്സ് ക്ലബ് നന്ദി രേഖപ്പെടുത്തി.
ഇനിയും ആരോഗ്യ, ജീവകാരുണ്യ, സാമൂഹിക സേവന മേഖലകളിൽ കൂടുതൽ ജനോപകാരപ്രദമായ പദ്ധതികൾ സംഘടിപ്പിച്ച് സമൂഹത്തിന് മാതൃകാപരമായ സേവനം തുടരുകയാണ് ക്ലബ്ബിന്റെ ലക്ഷ്യമെന്നും, വരും വർഷങ്ങളിലും ഇതിലും വിപുലമായ രീതിയിൽ മെഡിക്കൽ ക്യാമ്പുകളും മറ്റ് ക്ഷേമ പ്രവർത്തനങ്ങളും സംഘടിപ്പിക്കുമെന്നും ക്ലബ് ഭാരവാഹികൾ അറിയിച്ചു.