കോട്ടയം ജില്ലയിലെ ഗാന്ധിനഗർ പൊലീസ് സ്റ്റേഷനിലെ എസ്.എച്ച്.ഒ അടക്കമുള്ള പൊലീസ് ഉദ്യോഗസ്ഥർ എന്തുകൊണ്ടും മാതൃകയാണ്…! സംസ്ഥാന പൊലീസ് മേധാവിയ്ക്ക് തുറന്ന കത്തെഴുതി മനുഷ്യാവകാശ പ്രവർത്തകൻ; പൊതുപ്രവർത്തകന്റെ കത്ത് വൈറൽ

കോട്ടയം: പൊതുവിൽ പൊലീസ് സേന പഴി കേൾക്കുന്നതാണ് നമ്മുടെ നാട്ടിലെ പതിവ്. എന്തിനും ഏതിനും തെറിയും ചവിട്ടും കുത്തും ഏൽക്കാൻ വിധിക്കപ്പെട്ടവരാണ് പൊലീസ് ഉദ്യോഗസ്ഥർ. അത്യപൂർവമായാണ് പൊലീസ് ഉദ്യോഗസ്ഥർക്ക് കൈയ്യടികളും പൂച്ചെണ്ടുകളും കിട്ടുന്നത്. ഇത്തരത്തിൽ ഒരു കൂട പൂക്കൾ കൊണ്ട് സ്വീകരിച്ചിരിക്കുകയാണ് കോട്ടയം ഗാന്ധിനഗർ പൊലീസ് സ്റ്റേഷനിലെ ഉദ്യോഗസ്ഥരെ ഒരു പൊതുപ്രവർത്തകൻ. ഇദ്ദേഹം സംസ്ഥാന പൊലീസ് മേധാവിയ്ക്ക് ഇപ്പോൾ എഴുതിയ കത്താണ് സോഷ്യൽ മീഡിയയിൽ വൈറലായി മാറിയിരിക്കുന്നത്. തൃശൂർ കുരിയച്ചിറ സിയോൺ വില്ലയിൽ ജോണി വർഗീസ് എഴുതിയ കത്താണ് ഇപ്പോൾ സോഷ്യൽ മീഡിയയിൽ വൈറലായി മാറിയത്. ഗാന്ധിനഗർ സ്‌റ്റേഷൻ ഹൗസ് ഓഫിസർ ഇൻസ്‌പെക്ടർ ടി.ശ്രീജിത്തിനെയും ഇദ്ദേഹത്തിന്റെ സഹപ്രവർത്തകരെയും തുറന്നഭിനന്ദിച്ചാണ് ഈ പൊതു പ്രവർത്തകൻ ഇപ്പോൾ സംസ്ഥാന പൊലീസ് മേധാവിയ്ക്ക് കത്തയച്ചിരിക്കുന്നത്.

കത്തിന്റെ പൂർണരൂപം വായിക്കാം..!

സർ, ഞാൻ കഴിഞ്ഞ 35 വർഷമായി മനുഷ്യവകാശ/ പൊതുപ്രവർത്തനം നടത്തുന്ന വ്യക്തിയാണ്. പ്രധാനമായും സർക്കാർ സംവിധാനത്തിലെ അഴിമതിക്കെതിരെ നിയമപരമായി പേരാടുന്ന വ്യക്തിയാണ്. ഇന്നലെ (30.01.2025) ഞാൻ കോട്ടയം ജില്ലയിലെ ഗാന്ധിനഗർ പോലീസ് സ്റ്റേഷനിൽ ഒരാളെ കാണാനില്ല എന്ന പരാതിയിൽ കാണാനില്ല എന്നു പറയുന്ന വ്യക്തിയെ ഹാജരാക്കുന്നതിനായി ഞാൻ മേൽ പറഞ്ഞ പോലീസ് സ്റ്റേഷനിൽ പോയിരുന്നു. ആയതിൻ്റെ നടപടി ക്രമങ്ങൾ പൂർത്തിയാക്കുന്നതിനായി ഏകദേശം 4 മണികൂറോളം പോലീസ് സ്റ്റേഷനിൽ ഞാൻ ഉണ്ടായിരുന്നു. ഞാൻ പല വകുപ്പുകളിലേയും ഓഫീസുകളിൽ സ്ഥിരമായി ബന്ധപ്പെടുന്ന വ്യക്തിയാണ്. എന്നാൽ എന്നെ അത്ഭുതപ്പെടുത്തുന്ന അനുഭവമായിരുന്നു ഗാന്ധിനഗർ പോലീസ് സ്റ്റേഷനിൽ എനിക് ഉണ്ടായത്. അവിടെ വരുന്ന കക്ഷികൾ ഏല്ലാവരും തന്നെ വളരെ സംതൃപ്‌തരായിട്ടാണ് മടങ്ങി പോകുന്നതായി ഞാൻ കണ്ടത്, കക്ഷികളുടെ പരാതികൾ ശ്രദ്ധാപൂർവ്വം മനസ്സിലാക്കി അവരോട് നല്ലരീതിയിൽ പെരുമാറുകയും അവർക്ക് വേണ്ട നിർദേശങ്ങളും ഉപദേശങ്ങളും കൊടുക്കുന്നതായും പരാതികളിന്മേൽ നടപടികൾ നടത്തുന്നതായും കണ്ടു. കക്ഷികൾ വരുമ്പോഴുണ്ടായിരുന്ന മാനസികവസ്ഥയില്ലല്ല അവർ തിരികെ പോകുന്നത് വളരെ സംതൃപ്‌തിയോട് കൂടിയാണ് അവർ മടങ്ങുന്നതായി എനിക്ക് തോന്നിയത്. മത്രമല്ല പോലീസ് സ്റ്റേഷനിൽ നിന്നും പൊതുജനങ്ങൾ പ്രതീക്ഷിക്കുന്ന ആക്ഷേപങ്ങളോ, ഭീഷിണിയോ ഒന്നും തന്നെ അവിടെ എനിക് കാണാൻ കഴിഞ്ഞില്ല. അക്ഷാരാത്ഥത്തിൽ ജനം ആഗ്രഹിക്കുന്ന അങ്ങ് വിഭാവനം ചെയ്യുന്ന ജനമൈത്രി പോലീസ് സ്റ്റേഷൻ ആണ് ഞാൻ അവിടെ കണ്ടത്, ടി പോലീസ് സ്റ്റേഷൻ SHO മുതൽ താഴെക്കുള്ള എല്ലാ ഉദ്യോഗസ്ഥരും പൊതുജനങ്ങളോട് അത്രയും മാന്യമായാണ് ഇടപ്പെടുന്നത്. ആയതിനാൽ കോട്ടയം ജില്ലയിലെ ഗാന്ധിനഗർ പോലീസ് സ്റ്റേഷനും സ്റ്റേഷനിലെ SHO മുതൽ താഴെക്കുള്ള എല്ലാ ഉദ്യോഗസ്ഥരും എന്തുകൊണ്ടും മാതൃകയാണെന്ന് അങ്ങയുടെ ശ്രദ്ധയിൽ പ്പെടുത്തുന്നു.

സ്ഥലം : തൃശ്ശൂർ

തിയ്യതി : 31/01/2025

ജോണി വർഗ്ഗീസ്

Copy to SP കോട്ടയം