ലണ്ടൻ : ഇന്ത്യൻ ക്രിക്കറ്റ് താരം ഹാർദിക് പാണ്ഡ്യയും ബ്രീട്ടീഷ് ഗായിക ജാസ്മിൻ വാലിയയും തമ്മിലുള്ള അടുപ്പം അടുത്തിടെ വലിയ ശ്രദ്ധനേടിയ ഒന്നായിരുന്നു.മാസങ്ങള്‍ക്കു മുമ്ബ് ഗ്രീസില്‍ അവധിക്കാലം ആഘോഷിക്കുന്നതിനിടെ ഇരുവരും പങ്കുവെച്ച ചിത്രങ്ങളിലെ സാമ്യതയാണ് ഇരുവരും ഡേറ്റിങ്ങിലാണെന്ന അഭ്യൂഹങ്ങള്‍ക്ക് കാരണമായത്. പിന്നാലെ ഇക്കഴിഞ്ഞ ഐപിഎല്ലില്‍ മുംബൈ ഇന്ത്യൻസിന്റെ മത്സരവേദികളിലെയും മുംബൈ ടീം ബസിലെയും ജാസ്മിൻ വാലിയയുടെ സാന്നിധ്യവും ഇരുവരും തമ്മില്‍ അടുപ്പത്തിലാണെന്ന അഭ്യൂഹങ്ങള്‍ക്ക് ശക്തി പകരുന്നതായിരുന്നു. എന്നാലിപ്പോഴിതാ ഇരുവരും പിരിഞ്ഞെന്നതരത്തിലുള്ള റിപ്പോർട്ടുകള്‍ പുറത്തുവരികയാണ്.
ഹാർദിക്കും ജാസ്മിനും ഇൻസ്റ്റാഗ്രാമില്‍ പരസ്പരം അണ്‍ഫോളോ ചെയ്തത് ചൂണ്ടിക്കാട്ടി ഒരു റെഡ്ഡിറ്റ് യൂസറാണ് ഈ അഭ്യൂഹത്തിന് തുടക്കമിട്ടത്. സോഷ്യല്‍ മീഡിയയില്‍ അഭ്യൂഹങ്ങള്‍ നിറഞ്ഞപ്പോഴും ഇരുവരും തങ്ങള്‍ തമ്മിലുള്ള ബന്ധത്തെക്കുറിച്ച്‌ ഇതുവരെ സ്ഥിരീകരിച്ചിരുന്നില്ല. എന്നാല്‍ പലപ്പോഴും പലയിടത്തും ഇരുവരെയും ഒന്നിച്ചുകണ്ടത് ഡേറ്റിങ് അഭ്യൂഹങ്ങള്‍ക്ക് ശക്തിപകരുന്നതായിരുന്നു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
കഴിഞ്ഞ വർഷം മുൻഭാര്യയും സെർബിയൻ നടിയും മോഡലുമായ നടാഷ സ്റ്റാൻകോവിച്ചുമായി പിരിഞ്ഞ് ഒരു മാസം പിന്നിട്ടപ്പോഴാണ് ജാസ്മിനുമായി ഹാർദിക് അടുപ്പത്തിലാണെന്ന അഭ്യൂഹങ്ങള്‍ പ്രചരിച്ചത്. ഇതോടെ, നടാഷയുമായുള്ള ബന്ധം വേർപിരിയാൻ കാരണം ഹാർദിക് പാണ്ഡ്യയാണെന്ന തരത്തിലും സോഷ്യല്‍ മീഡിയയില്‍ പോസ്റ്റുകള്‍ പ്രത്യക്ഷപ്പെട്ടു.
പിന്നാലെ ഐപിഎല്ലില്‍ മുംബൈ ഇന്ത്യൻസ് – കൊല്‍ക്കത്ത നൈറ്റ് റൈഡേഴ്സ് മത്സരവേദിയിലെ ജാസ്മിന്റെ സാന്നിധ്യം ശ്രദ്ധ നേടിയിരുന്നു. വാംഖഡെ സ്റ്റേഡിയത്തിലും മുംബൈ ഇന്ത്യൻസ് ടീം ബസിലും ജാസ്മിന്റെ സാന്നിധ്യമുണ്ടായിരുന്നു. മത്സരത്തില്‍ കൊല്‍ക്കത്ത നൈറ്റ് റൈഡേഴ്സിനെതിരെ മുംബൈ ഇന്ത്യൻസ് അനായസ വിജയത്തിലേക്ക് നീങ്ങിയപ്പോള്‍ ടീമിനും ക്യാപ്റ്റൻ ഹാർദിക് പാണ്ഡ്യയ്ക്കും വേണ്ടി ഗാലറിയില്‍ ആർത്തുവിളിക്കുന്ന ജാസ്മിന്റെ ദൃശ്യങ്ങളും സോഷ്യല്‍ മീഡിയയില്‍ വൈറലായി. സാധാരണ കളിക്കാരെ കൂടാതെ അവരുടെ കുടുംബാംഗങ്ങള്‍ക്കാണ് ടീം ബസില്‍ പ്രവേശനമുള്ളത്. ഇതില്‍ ജാസ്മിന്റെ സാന്നിധ്യം കണ്ടതോടെ ഡേറ്റിങ് അഭ്യൂഹങ്ങള്‍ ശക്തിയാർജിച്ചു. ദുബായില്‍ നടന്ന ചാമ്ബ്യൻസ് ട്രോഫി ഫൈനല്‍ മത്സരത്തിനും ജാസ്മിൻ എത്തിയിരുന്നു. സ്റ്റേഡിയത്തില്‍ നിന്നുള്ള താരത്തിന്റെ ചിത്രം അന്നും സോഷ്യല്‍ മീഡിയയില്‍ വൈറലായി.
ഇന്ത്യയില്‍ വേരുകളുള്ള ബ്രിട്ടീഷ് ഗായികയാണ് ജാസ്മിൻ വാലിയ. ഇംഗ്ലീഷിനൊപ്പം ഹിന്ദി, പഞ്ചാബി ഭാഷകളിലും പാട്ടുകളിറക്കിയിട്ടുണ്ട് ജാസ്മിൻ. ഇന്ത്യൻ ദമ്ബതിമാരുടെ മകളായി എസ്സെക്സിലാണ് ജനനം. ഏഴാമത്തെ വയസ്സിലാണ് പാട്ടുപാടാൻ തുടങ്ങുന്നത്. അന്നൊക്കെ ഇന്ത്യൻ സംഗീതത്തിലും ബോളിവുഡ് സിനിമകളിലുമായിരുന്നു ജാസ്മിന് താത്പര്യം കൂടുതല്‍. ബ്രിട്ടനിലെ ഒരു ബാങ്കില്‍ കുറച്ചുനാള്‍ കസ്റ്റമർ അഡൈ്വസറിയായി ജോലി ചെയ്തു. അതിനുശേഷമാണ് സംഗീതത്തിലേക്ക് കടക്കുന്നത്. ബ്രിട്ടീഷ് റിയാലിറ്റി ഷോ ആയ ‘ദ ഒണ്‍ലി വേ ഈസ് എസ്സെക്സി’ല്‍ പങ്കെടുത്തതോടെയാണ് അവർ ശ്രദ്ധിക്കപ്പെടുന്നത്. 2017-ല്‍ പുറത്തിറക്കിയ ആദ്യ സിംഗിളായ ബോം ഡിഗ്ഗി വളരെ പെട്ടെന്നാണ് ഹിറ്റായത്.
2024-ലാണ് നടാഷ സ്റ്റാൻകോവിച്ചുമായുള്ള വിവാഹ ബന്ധം വേർപിരിഞ്ഞതായി ഹാർദിക് പ്രഖ്യാപിച്ചത്. മകൻ അഗസ്ത്യയ്ക്കൊപ്പം നടാഷ സെർബിയയിലേക്ക് മടങ്ങുകയും ചെയ്തിരുന്നു. 2020-ലായിരുന്നു ഇരുവരുടേയും വിവാഹം.