റിലീസ് ചെയ്തിട്ട് ഒൻപത് മാസങ്ങൾ ; കളങ്കാവൽ വരെ ഒടിടിയിലേക്ക് എത്തുന്നു; ആ മമ്മൂട്ടി ചിത്രം എന്ന് വരുമെന്ന് ആരാധകർ?

ചില സിനിമകൾ അങ്ങനെയാണ് ഒടിടി റിലീസുകൾക്കായി പ്രേക്ഷകർ കാത്തിരിക്കും. തിയറ്ററിൽ സിനിമ മിസ് ആയവർക്കോ കണ്ടവർക്ക് വീണ്ടും കാണാനുമൊക്കെ ആകും ആ കാത്തിരിപ്പ്. റിലീസ് ചെയ്ത് മാസങ്ങളും വർഷങ്ങളും കഴിഞ്ഞ സിനിമകളും ഇക്കൂട്ടത്തിലുണ്ടാകാറുണ്ട്. അത്തരത്തിലൊരു സിനിമയാണ് ബസൂക്ക. മമ്മൂട്ടി നായകമനായി എത്തിയ ചിത്രം റിലീസ് ചെയ്തിട്ട് ഒൻപത് മാസം പിന്നിട്ടെങ്കിലും ഇതുവരെയും ചിത്രം ഒടിടിയിൽ എത്തിയിട്ടില്ല. അതിന്റെ നിരാശ സിനിമാസ്വാദകർ സോഷ്യൽ മീഡിയയിലൂടെ പങ്കിടാറുമുണ്ട്.

2025 ഏപ്രിൽ 10ന് ആയിരുന്നു മമ്മൂട്ടി നായകനായി എത്തിയ ബസൂക്ക തിയറ്ററിൽ എത്തിയത്. ദീനോ ഡെന്നിസ് തിരക്കഥ എഴുതി സംവിധാനം ചെയ്ത ചിത്രം ആക്ഷൻ ത്രില്ലർ ​ഗണത്തിൽപ്പെട്ട ഒന്നായിരുന്നു. മമ്മൂട്ടി സ്റ്റൈലിഷ് വേഷത്തിലെത്തിയ ബസൂക്കയിൽ ​ഗൗതം വാസുദേവ് മേനോനും പ്രധാന വേഷത്തിൽ എത്തിയിരുന്നു. വലിയ ഹൈപ്പിലെത്തിയ ചിത്രത്തിന് പക്ഷേ തിയറ്ററിൽ വേണ്ടത്ര ശോഭിക്കാനായില്ല. പിന്നാലെ ഒടിടി റിലീസിനായി പ്രേക്ഷകർ കാത്തിരുന്നു. ഓരോ മാസം ഇന്ന് വരും നാളെ വരുമെന്നെല്ലാം അഭ്യൂഹങ്ങൾ വന്നു. എന്നാൽ ഔദ്യോ​ഗിക വിശദീകരണങ്ങൾ ഒന്നും തന്നെ വന്നിട്ടില്ല. പുതുവർഷത്തിലെങ്കിലും ബസൂക്ക ഒടിടിയിൽ വരുമോ എന്നാണ് ഇപ്പോൾ ഉയരുന്ന ചോദ്യം.

അതേസമയം, ബസൂക്കയ്ക്ക് ഒപ്പം റിലീസ് ചെയ്തതും പിന്നീട് വന്നതുമായ ഭൂരിഭാ​ഗം സിനിമകളും ഒടിടിയിൽ ഇതിനകം എത്തിക്കഴിഞ്ഞു. മമ്മൂട്ടിയുടേതായി ഏറ്റവും ഒടുവിൽ റിലീസ് ചെയ്ത കളങ്കാവൽ ജനുവരിയിൽ ഒടിടി സ്ട്രീമിം​ഗ് ആരംഭിക്കും. ജിതിൻ കെ ജോസ് സംവിധാനം ചെയ്ത ഈ ചിത്രത്തിൽ മമ്മൂട്ടി പ്രതിനായകനായാണ് എത്തിയത്. വിനായകൻ ആയിരുന്നു നായകനായത്. വൻ പ്രേക്ഷക- നിരൂപക പ്രശംസ നേടിയ ചിത്രം ആ​ഗോള തലത്തിൽ 80 കോടിക്ക് മുകളിൽ കളക്ഷൻ നേടിയെന്നാണ് റിപ്പോർട്ട്.