ഹോട്ടൽ ഭക്ഷണത്തോട് ‘നോ’; ആരോഗ്യത്തിനായി വീട്ടിലെ ഭക്ഷണത്തിലേക്ക് മടങ്ങാം

ഹെൽത്ത്‌ ഡെസ്ക്:ഹോട്ടലിലെ ഭക്ഷണത്തേക്കാൾ വീട്ടിലുണ്ടാക്കുന്ന ഭക്ഷണം ആരോഗ്യത്തിനും സാമ്പത്തികത്തിനും ഒരുപോലെ ഗുണകരമാണെന്ന് പഠനങ്ങൾ വ്യക്തമാക്കുന്നു. സൗകര്യവും രുചിയും കണക്കിലെടുത്ത് പുറത്തുനിന്ന് ഭക്ഷണം കഴിക്കുന്നവരുടെ എണ്ണം വർധിക്കുമ്പോഴും, ആരോഗ്യപരമായ അപകടസാധ്യതകൾ ഇതോടൊപ്പം കൂടുകയാണെന്ന മുന്നറിയിപ്പാണ് വിദഗ്ധർ നൽകുന്നത്.

ഭക്ഷണത്തിലെ ചേരുവകൾ എന്തൊക്കെയാണെന്ന് വ്യക്തമായി അറിഞ്ഞ് വിശ്വസ്തമായി കഴിക്കണമെങ്കിൽ വീട്ടിൽ തയ്യാറാക്കുന്ന ഭക്ഷണമാണ് ഏറ്റവും സുരക്ഷിതം. ഹോട്ടൽ ഭക്ഷണങ്ങളിൽ രുചിയും നിറവും കൂട്ടാൻ അമിതമായ എണ്ണ, ബട്ടർ, ഉപ്പ്, മധുരം തുടങ്ങിയവ ചേർക്കുന്നതായി വിവിധ പഠനങ്ങൾ ചൂണ്ടിക്കാണിക്കുന്നു.ജേണൽ ഓഫ് ന്യൂട്രീഷൻ (2023) പ്രസിദ്ധീകരിച്ച പഠനം പ്രകാരം, വീട്ടിലുണ്ടാക്കുന്ന ഭക്ഷണം സ്ഥിരമായി കഴിക്കുന്നവർ, പുറത്ത് നിന്ന് ഭക്ഷണം കഴിക്കുന്നവരെക്കാൾ കുറവ് കാലറിയും മധുരവുമാണ് ശരീരത്തിലേക്ക് സ്വീകരിക്കുന്നത്.

അതേസമയം, അമേരിക്കൻ ജേണൽ ഓഫ് പബ്ലിക് ഹെൽത്ത് റിപ്പോർട്ട് ചെയ്യുന്നതനുസരിച്ച്, ഹോട്ടൽ ഭക്ഷണങ്ങളിൽ വീട്ടിലെ ഭക്ഷണത്തെക്കാൾ ഇരട്ടി കൊഴുപ്പും കാലറിയും അടങ്ങിയിരിക്കാൻ സാധ്യതയുണ്ട്.സാമ്പത്തികമായി നോക്കിയാലും വീട്ടിലെ ഭക്ഷണം കൂടുതൽ ലാഭകരമാണ്. പുറത്തുനിന്ന് ഭക്ഷണം ഓർഡർ ചെയ്യുമ്പോൾ ഭക്ഷണച്ചെലവിനൊപ്പം ഡെലിവറി ചാർജും നികുതിയും കൂടി നൽകേണ്ടി വരുന്നത് കുടുംബ ബജറ്റിനെ പ്രതികൂലമായി ബാധിക്കുന്നു.വൃത്തിയും ശുചിത്വവും മറ്റൊരു പ്രധാന ഘടകമാണ്. ഹോട്ടൽ ഭക്ഷണത്തിന്റെ ശുചിത്വ നിലവാരത്തിൽ ഉറപ്പ് നൽകാനാകില്ലെങ്കിലും, വീട്ടിൽ പാകം ചെയ്യുന്ന ഭക്ഷണത്തിൽ ഉപയോഗിക്കുന്ന മീൻ, ഇറച്ചി, പച്ചക്കറികൾ എന്നിവ സ്വന്തം കൈയ്യാൽ ശുചീകരിക്കുന്നതിനാൽ വയറുസംബന്ധമായ രോഗങ്ങൾ ഒഴിവാക്കാൻ സാധിക്കും.

ആരോഗ്യ ഗുണങ്ങൾക്കൊപ്പം മാനസികാരോഗ്യത്തിനും പാചകം സഹായകരമാണെന്ന് പഠനങ്ങൾ പറയുന്നു. പച്ചക്കറി അരിയൽ, ഭക്ഷണം വഴറ്റൽ, ഇളക്കൽ തുടങ്ങിയ പ്രവൃത്തികൾ മാനസിക സമ്മർദ്ദം കുറയ്ക്കുകയും ശ്രദ്ധ വർധിപ്പിക്കുകയും ചെയ്യുന്നു. ഭക്ഷണത്തിന്റെ മണവും നിറവും മനസ്സിന് സന്തോഷം പകരുന്ന ഘടകങ്ങളാണ്.ഉപ്പ്, മധുരം, എരിവ് എന്നിവയുടെ അളവ് സ്വന്തം ഇഷ്ടാനുസരണം നിയന്ത്രിക്കാൻ കഴിയുന്നതിലൂടെ ആരോഗ്യകരമായ ഭക്ഷണശൈലി രൂപപ്പെടുത്താൻ വീട്ടിലെ ഭക്ഷണം സഹായിക്കുന്നു. ഇതിലൂടെ ഓരോരുത്തരും കൂടുതൽ സ്വയംപര്യാപ്തരാകുന്നതായും വിദഗ്ധർ അഭിപ്രായപ്പെടുന്നു.