തദ്ദേശ തിരഞ്ഞെടുപ്പ്:തിരഞ്ഞെടുപ്പുകളില്‍ ഡ്യൂട്ടിയിലുള്ള ജീവനക്കാർക്ക് വോട്ടിംഗ് നാളെ മുതൽ തുടങ്ങും

ന്യൂസ്‌ ഡെസ്ക് :കേരളത്തിൽ നവംബർ 26 മുതൽ തദ്ദേശ തിരഞ്ഞെടുപ്പിനായുള്ള പോസ്റ്റൽ ബാലറ്റ് വിതരണം ആരംഭിക്കുമെന്ന് സംസ്ഥാന തിരഞ്ഞെടുപ്പ് കമ്മീഷൻ അറിയിച്ചു. സ്വന്തം ബൂത്തിലേക്ക് വോട്ട് ചെയ്യാന്‍ കഴിയാത്ത സർക്കാർ, അർദ്ധസർക്കാർ ജീവനക്കാരും പോലീസ് ഉദ്യോഗസ്ഥരും ഈ സൗകര്യം ഉപയോഗിക്കാം.തിരഞ്ഞെടുപ്പ് ഡ്യൂട്ടിക്ക് നിയോഗിക്കപ്പെട്ട എല്ലാ ജീവനക്കാർക്കും ഔദ്യോഗിക ഉത്തരവുകൾ സമയബന്ധിതമായി നൽകണമെന്ന് കമ്മീഷൻ ജില്ലാ തിരഞ്ഞെടുപ്പ് ഉദ്യോഗസ്ഥരോടും വരണാധികാരികളോടും നിർദേശം നൽകി. ഉത്തരവിന്റെ പകർപ്പ് സഹിതം നിർദ്ദിഷ്ട ഫോമില്‍ അപേക്ഷിക്കുമ്പോൾ പോസ്റ്റൽ ബാലറ്റ് ലഭിക്കും.

ആർക്കെല്ലാം പോസ്റ്റല്‍ ബാലറ്റ് ലഭിക്കും?

പോളിംഗ് സ്റ്റേഷനുകളിൽ ഡ്യൂട്ടിക്കുള്ള ഉദ്യോഗസ്ഥർ

സംസ്ഥാന തിരഞ്ഞെടുപ്പ് കമ്മീഷൻ ജീവനക്കാർ

ജില്ലാ, പഞ്ചായത്ത്, മുനിസിപ്പാലിറ്റി, കോർപ്പറേഷൻ തിരഞ്ഞെടുപ്പ് വിഭാഗത്തിലെ ഉദ്യോഗസ്ഥർ

വരണാധികാരി, ഉപവരണാധികാരി ഓഫീസുകളിലെ സ്റ്റാഫ്

ഒബ്സർവർമാർ, സെക്ടറൽ ഓഫീസർമാർആന്റി ഡിഫേസ്മെന്റ് സ്ക്വാഡ് അംഗങ്ങൾ

തിരഞ്ഞെടുപ്പ് സുരക്ഷ ചുമതലയുള്ള പോലീസ് ഉദ്യോഗസ്ഥർ

അപേക്ഷിക്കേണ്ട വിധം

പോസ്റ്റൽ ബാലറ്റിന് ഫോം 15 പൂരിപ്പിച്ച് ബന്ധപ്പെട്ട വരണാധികാരിക്ക് സമർപ്പിക്കണം. ഫോം ലഭിക്കുന്നത് അവരുടെ ഓഫീസിലോ സംസ്ഥാന തിരഞ്ഞെടുപ്പ് കമ്മീഷന്റെ വെബ്സൈറ്റിലോ ആയിരിക്കും.ത്രിതല പഞ്ചായത്ത് തിരഞ്ഞെടുപ്പിന് ഗ്രാമം, ബ്ലോക്ക്, ജില്ലാ തലങ്ങളിൽ മൂന്ന് അപേക്ഷകൾ നൽകണം, എന്നാൽ അവയെല്ലാം ഒരു കവറിൽ ആക്കി ഒരൊറ്റ വരണാധികാരിക്ക് നൽകുന്നത് മതി. മുനിസിപ്പാലിറ്റിയിലേയും കോർപ്പറേഷനിലേയും തിരഞ്ഞെടുപ്പിന് ഒരു അപേക്ഷ മതി. അപേക്ഷ വോട്ടെടുപ്പിന് കുറഞ്ഞത് ഏഴ് ദിവസം മുമ്പ് ലഭിക്കണം.

ലഭിക്കുന്ന പേപ്പറുകൾ

ത്രിതല പഞ്ചായത്തിനായി മൂന്നുസെറ്റ് ബാലറ്റ് പേപ്പറുകളും അനുബന്ധ ഫോമുകളും ലഭിക്കും. മുനിസിപ്പാലിറ്റി/കോർപ്പറേഷൻ തിരഞ്ഞെടുപ്പിന് ഓരോന്നും ഒന്ന് വീതം നൽകും. ഏവയും ഒരു വലിയ കവറിലാക്കി നേരിട്ട് അല്ലെങ്കിൽ സ്പീഡ് പോസ്റ്റിലൂടെ അപേക്ഷകനു നൽകും.ഡ്യൂട്ടിയിലുള്ള ജീവനക്കാരുടെ വോട്ടവകാശം നഷ്ടപ്പെടാതിരിക്കാൻ എല്ലാ വരണാധികാരികൾക്കും പ്രത്യേക നിർദേശമുണ്ടെന്ന് കമ്മീഷൻ അറിയിച്ചു.