പത്തനംതിട്ട :ശബരിമലയിലെ സ്വർണക്കൊള്ള കേസിൽ പ്രതിയായ ഉണ്ണികൃഷ്ണൻ പോറ്റിയുടെ മൊഴി അന്വേഷണ സംഘത്തിന് പുതിയ വഴിത്തിരിവുകൾ തുറക്കുന്നു. തൻ്റെ ഉന്നതരുമായി ഉള്ള ബന്ധങ്ങളാണ് തട്ടിപ്പിനായി ദുരുപയോഗം ചെയ്യപ്പെട്ടതെന്ന് ഉണ്ണികൃഷ്ണൻ പോറ്റി മൊഴിയിൽ പറഞ്ഞു.മുൻമന്ത്രി കടകംപള്ളി സുരേന്ദ്രനും, മുൻ ദേവസ്വം ബോർഡ് പ്രസിഡന്റ് എ. പത്മകുമാറും, തന്ത്രിയും ഉൾപ്പെടെ നിരവധി പ്രമുഖരുമായി അടുപ്പമുണ്ടായിരുന്നുവെന്ന് പോറ്റി മൊഴിയിൽ വെളിപ്പെടുത്തി.മുരാരി ബാബു ഉൾപ്പെടെയുള്ള ശബരിമലയിലെ ഉന്നത ഉദ്യോഗസ്ഥരുമായും അടുത്ത ബന്ധം പുലർത്തിയിരുന്നതായി അദ്ദേഹം സമ്മതിച്ചു.
പോട്ടിയുടെ മൊഴി പ്രകാരം, ചെന്നൈ–ബെംഗളൂരു കേന്ദ്രീകരിച്ച വൻ സംഘമാണ് കവർച്ച നടത്തിയത്. ഇവർ തന്നെയാണ് ഒടുവിൽ തന്നെ കുടുക്കിയതെന്നും പോറ്റി ആരോപിച്ചു.ചെന്നൈ സ്വദേശി കൽപേഷ് എന്നും ഹൈദരാബാദ് സ്വദേശി നാഗേഷ് എന്നും പേരുള്ള രണ്ടുപേരാണ് തട്ടിപ്പിൽ നിർണായക പങ്കുവഹിച്ചതെന്ന് പോറ്റി അന്വേഷണ സംഘത്തിന് കൈമാറിയ മൊഴിയിൽ പറഞ്ഞു.ഇതിനെ തുടർന്ന്, ചെന്നൈ, ബെംഗളൂരു, ഹൈദരാബാദ് എന്നീ നഗരങ്ങളിലെ ഉണ്ണികൃഷ്ണൻ പോറ്റിയുടെ ബന്ധങ്ങൾ കേന്ദ്രീകരിച്ച് അന്വേഷണ സംഘം അന്വേഷണം വ്യാപിപ്പിച്ചു.പോട്ടി നൽകിയ വിവരങ്ങളുടെ അടിസ്ഥാനത്തിൽ കൽപേഷിനെയും നാഗേഷിനെയും എസ്ഐടി ബന്ധപ്പെടാൻ ശ്രമിച്ചെങ്കിലും ഫലം കണ്ടില്ല. ഇതോടെ ബെംഗളൂരുവിലേക്ക് അന്വേഷണ സംഘം തിരിച്ചേക്കുമെന്നാണ് സൂചന.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
സ്വർണക്കൊള്ള കേസിനൊപ്പം 2025ലെ ദ്വാരപാലക ശിൽപ്പപാളികളുടെ സ്വർണം പൂശലും അന്വേഷണ പരിധിയിൽ ഉൾപ്പെടുത്തിയിട്ടുണ്ട്.2019 മുതൽ 2025 വരെയുള്ള പോറ്റിയുടെ ഇടപാടുകൾ സംശയാസ്പദമാണെന്ന് പ്രത്യേക സംഘം കോടതിയെ അറിയിച്ചു.കഴിഞ്ഞ ദിവസം സന്നിധാനത്ത് സ്ഥാപിച്ച ശിൽപ്പപാളികളിലെ സ്വർണം പൂശിയത് പോറ്റിയാണെന്നും,2019ൽ 40 വർഷം ഗ്യാരണ്ടിയെന്ന് പറഞ്ഞ് സ്വർണം പൂശിയ പാളികൾ ആറ് വർഷത്തിനുള്ളിൽ വീണ്ടും സ്വർണം പൂശാൻ കൊണ്ടുപോയതായും റിപ്പോർട്ടിൽ പറയുന്നു.
2024ൽ ഉണ്ണികൃഷ്ണൻ പോറ്റിയും മുരാരി ബാബുവും അടങ്ങിയ സംഘം വീണ്ടും സ്വർണം പൂശണമെന്ന ആശയം മുന്നോട്ടുവെച്ചത്,വീണ്ടും സ്വർണം തട്ടാനുള്ള നീക്കമായിരുന്നുവെന്ന് സംശയിച്ച് 2015ലെ ഇടപാടുകളും പരിശോധിക്കാനാണ് എസ്.ഐ.ടി തീരുമാനിച്ചത്.2019 ജൂലൈ മുതൽ 2025 സെപ്തംബർ 27 വരെ നടന്ന മുഴുവൻ ഇടപാടുകളും പരിശോധിക്കുമെന്നും റിമാൻഡ് റിപ്പോർട്ടിൽ വ്യക്തമാക്കുന്നു.ഇതോടെ നിലവിലെ ദേവസ്വം ബോർഡും അന്വേഷണ പരിധിയിലാകാനാണ് സാധ്യത.