കൊച്ചി: എറണാകുളം ജില്ലാ കോടതി സമുച്ചയത്തിലെ ശുചിമുറികളിൽ നിന്ന് സ്ഥിരമായി വാട്ടർ ടാപ്പുകൾ മോഷ്ടിച്ചിരുന്ന കള്ളൻ പോലീസ് പിടിയിലായി. കൊല്ലം കന്റോൺമെന്റ് സൗത്ത് പുതുവാൽ പുത്തൻവീട്ടിൽ ഷാജൻ എന്ന ഷാജിയെയാണ് സെൻട്രൽ പൊലീസ് അറസ്റ്റ് ചെയ്തത്.കോടതി സമുച്ചയത്തിന്റെ താഴത്തെ നിലയിലെ ശുചിമുറിയിൽ ടാപ്പ് അഴിച്ചുകൊണ്ടിരിക്കെയാണ് ഇയാളെ ജീവനക്കാർ കണ്ടെത്തി പൊലീസിന്റെ കയ്യിൽ ഏൽപ്പിച്ചത്. ആറു മാസം മുമ്പാണ് ഇയാൾ ജയിലിൽ നിന്നിറങ്ങിയത്. ഈ മാസം പകുതിയോടെ കോടതി കെട്ടിടത്തിന്റെ ആറു നിലകളിലെയും ശുചിമുറികളിൽ നിന്ന് സ്റ്റീൽ ടാപ്പുകൾ മോഷണം പോയിരുന്നു.
പത്ത് ആയിരം രൂപയോളം വിലമതിക്കുന്ന ടാപ്പുകളാണ് മോഷണം പോയത്. പൈപ്പിന്റെ വാൽവ് അടച്ച്, ഉച്ചയോടെയാണ് ഷാജി മോഷണം നടത്തിയിരുന്നത്. വെള്ളം ഇല്ലാതായതിനെ തുടർന്ന് ജീവനക്കാർ നടത്തിയ പരിശോധനയിലാണ് മോഷണം വ്യക്തമായത്. ചീഫ് ജുഡീഷ്യൽ മജിസ്ട്രേറ്റ് ഉൾപ്പെടെയുള്ള ജഡ്ജിമാരുടെ ചേംബർ സ്ഥിതി ചെയ്യുന്ന നില ഒഴികെ മറ്റെല്ലാ നിലകളിലുമാണ് മോഷണം നടന്നത്.പോലീസ് പരിശോധനയിൽ സിസിടിവി ദൃശ്യങ്ങൾ പരിശോധിച്ച് സംശയം ഷാജിയിലേക്കാണ് എത്തിയതെന്ന് അധികൃതർ അറിയിച്ചു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
തുടർന്നു ഇയാൾ കോടതിയിലെത്തിയാൽ നിരീക്ഷിക്കാൻ മഫ്തിയിലുണ്ടായിരുന്ന പൊലീസിനെ നിയോഗിച്ചു. സാധാരണ ചൊവ്വാഴ്ചകളിലാണ് ഇയാൾ കോടതിയിൽ പ്രത്യക്ഷപ്പെടാറുണ്ടായിരുന്നത്.ഇന്ന് രാവിലെ വീണ്ടും കോടതിയിൽ എത്തിയ ഇയാൾ ടാപ്പ് അഴിക്കുന്നതിനിടെ പൊലീസിനെ കാണാതെ രക്ഷപെടാൻ ശ്രമിച്ചെങ്കിലും പിടിയിലായി. തിരുവനന്തപുരം മെഡിക്കൽ കോളജ് പൊലീസ് സ്റ്റേഷൻ പരിധിയിൽ ഇയാൾക്കെതിരെ മൂന്ന് മൊബൈൽ മോഷണ കേസുകളുമുണ്ട്. പൊലീസിന്റെ അന്വേഷണത്തിൽ ഇവയും ഉൾപ്പെടുത്തി നടപടികൾ തുടരുന്നു.