ഹെൽത്ത് ഡെസ്ക്:നല്ല കാഴ്ചയ്ക്കായി കാരറ്റ് കഴിക്കണം എന്ന ഉപദേശം നമ്മൾ ജീവിതത്തിലെ ഏതെങ്കിലും ഘട്ടത്തിൽ കേട്ടിട്ടുണ്ടാകും. കാരറ്റിൽ ധാരാളമായി അടങ്ങിയിരിക്കുന്ന ബീറ്റാ കരോട്ടിൻ ശരീരത്തിൽ വിറ്റാമിൻ എ ആയി മാറുന്നതുകൊണ്ടാണ് ഇത് കണ്ണുകളുടെ ആരോഗ്യത്തിന് ഗുണകരമെന്ന് പറയുന്നത്. എന്നാൽ, ഇന്നത്തെ ജീവിത സാഹചര്യങ്ങളിൽ കണ്ണുകളുടെ ആരോഗ്യം സംരക്ഷിക്കാൻ കാരറ്റ് മാത്രം മതിയാകില്ലെന്ന് വിദഗ്ധർ മുന്നറിയിപ്പ് നൽകുന്നു.സ്ക്രീൻ ടൈം വർധിക്കുന്നതും, വായു മലിനീകരണവും, പ്രായാധിക്യവും, ജീവിതശൈലി രോഗങ്ങളും കൂടിവരുന്ന സാഹചര്യത്തിൽ കണ്ണുകളുടെ ആരോഗ്യം ഒരു പച്ചക്കറിയെ മാത്രം ആശ്രയിച്ചുള്ളതല്ല.
ശരിയായ പോഷകങ്ങൾ, മതിയായ വെള്ളം, ആരോഗ്യകരമായ ജീവിതശൈലി എന്നിവയിലൂടെയാണ് നല്ല കാഴ്ച നിലനിർത്താൻ കഴിയുക.കണ്ണുകളെ ഓക്സിഡേറ്റീവ് സ്ട്രെസിൽ നിന്ന് സംരക്ഷിക്കാൻ വിറ്റാമിൻ സി, വിറ്റാമിൻ ഇ പോലുള്ള ആന്റിഓക്സിഡന്റുകൾ നിർണായക പങ്ക് വഹിക്കുന്നു. ഇവ പ്രായം മൂലമുള്ള കണ്ണിലെ കോശ നാശം ഒരു പരിധിവരെ തടയാനും സഹായിക്കുന്നു. വിറ്റാമിൻ ഇ നട്ട്സ്, വിത്തുകൾ, വിവിധ പഴങ്ങൾ എന്നിവയിൽ നിന്ന് ലഭിക്കും.റെറ്റിനയിലെ പ്രകാശം തിരിച്ചറിയുന്ന ഫോട്ടോറെസപ്റ്റർ കോശങ്ങളുടെ പ്രവർത്തനത്തിന് വിറ്റാമിൻ എ അത്യന്താപേക്ഷിതമാണ്. ഈ വിറ്റാമിന്റെ കുറവ് നൈറ്റ് ബ്ലൈൻഡ്നസ്, കണ്ണ് വരണ്ടുപോകൽ തുടങ്ങിയ ഗുരുതര പ്രശ്നങ്ങൾക്ക് കാരണമാകാം. ലിവർ, മുട്ടയുടെ മഞ്ഞ, പാലും പാലുത്പന്നങ്ങളും വിറ്റാമിൻ എ ലഭിക്കുന്ന പ്രധാന ആഹാരങ്ങളാണ്.കണ്ണുകളുടെ ഘടനയും പ്രവർത്തനവും നിലനിർത്താൻ സിങ്ക് എന്ന ഖനിജവും അത്യാവശ്യമാണ്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ശരീരത്തിൽ സിങ്കിന്റെ അളവ് കുറയുമ്പോൾ പ്രത്യേകിച്ച് കുറഞ്ഞ വെളിച്ചത്തിൽ കാണാനുള്ള കഴിവ് കുറയാൻ സാധ്യതയുണ്ട്. അതുപോലെ തന്നെ, ഓമേഗ-3 ഫാറ്റി ആസിഡുകൾ കണ്ണുകളിലെ ഇൻഫ്ലമേഷൻ കുറയ്ക്കുകയും കോശങ്ങളുടെ പ്രവർത്തനം മെച്ചപ്പെടുത്തുകയും ചെയ്യുന്നു. മത്സ്യം, കിവി, പപ്പായ, അവക്കാഡോ തുടങ്ങിയവ ഓമേഗ-3 സമൃദ്ധമായ ഭക്ഷണങ്ങളാണ്.അതിനാൽ, കണ്ണുകളുടെ ആരോഗ്യത്തിനായി കാരറ്റിനെ മാത്രം ആശ്രയിക്കാതെ, സമതുലിതമായ ഭക്ഷണക്രമവും ആരോഗ്യകരമായ ജീവിതശീലങ്ങളും പിന്തുടരണമെന്ന് ആരോഗ്യ വിദഗ്ധർ നിർദേശിക്കുന്നു.