കെ.എസ്.ആർ.ടി.സി.യുമായി കൈകോർത്ത് അപ്പോളോ അഡ്‌ലക്സ്; 16 ഡിപ്പോകളിൽ ഹെൽത്ത് കോർണറുകളും ജീവനക്കാർക്ക് ചികത്സാ ആനുകൂല്യങ്ങളും

കൊച്ചി: കെ.എസ്.ആർ.ടി.സി. യാത്രക്കാരുടെയും ജീവനക്കാരുടെയും ആരോഗ്യ സുരക്ഷ ഉറപ്പാക്കുന്നതിനായി പ്രമുഖ മൾട്ടി സ്പെഷ്യാലിറ്റി ആശുപത്രിയായ അപ്പോളോ അഡ്‌ലക്സ് ഹോസ്പിറ്റൽ കെ.എസ്.ആർ.ടി.സി.യുമായി സഹകരിച്ച് പ്രത്യേക ആരോഗ്യ പദ്ധതികൾ നടപ്പിലാക്കുന്നു. ഇതിന്റെ ഭാഗമായി എറണാകുളം, തൃശൂർ ജില്ലകളിലെ 16 കെ.എസ്.ആർ.ടി.സി. ഡിപ്പോകളിൽ ‘അപ്പോളോ അഡ്‌ലക്സ് ഹെൽത്ത് കോർണറുകൾ’ സ്ഥാപിക്കും.

എറണാകുളം കെ.എസ്.ആർ.ടി.സി. ബസ് സ്റ്റേഷന്റെ നവീകരിച്ച കെട്ടിടോദ്ഘാടനവും പുതിയ ഡിപ്പോ മന്ദിരത്തിന്റെ ശിലാസ്ഥാപനവും നടന്ന ചടങ്ങിലാണ് ഈ ആരോഗ്യ പങ്കാളിത്തം ഔദ്യോഗികമായി പ്രഖ്യാപിച്ചത്. യാത്രക്കാർക്കും ജീവനക്കാർക്കും അടിയന്തര സാഹചര്യങ്ങളിൽ ഉപയോഗപ്രദമാകുന്ന വിധം ഫസ്റ്റ് എയ്ഡ് ബോക്സ്, വീൽചെയർ, ശരീരഭാരവും ഉയരവും അളക്കുന്നതിനുള്ള മെഷീനുകൾ എന്നിവ ഈ ഹെൽത്ത് കോർണറുകളിൽ ലഭ്യമാക്കും. കെ.എസ്.ആർ.ടി.സി.യിലെ നിലവിലുള്ള ജീവനക്കാർക്കും വിരമിച്ചവർക്കും അവരുടെ കുടുംബാംഗങ്ങൾക്കും (അച്ഛൻ, അമ്മ, പങ്കാളി, മക്കൾ) ആശുപത്രിയിൽ പ്രത്യേക ചികിത്സാ ആനുകൂല്യങ്ങളും ഉറപ്പാക്കിയിട്ടുണ്ട്.

സൗജന്യ ഒ.പി. രജിസ്‌ട്രേഷന് പുറമെ, കൺസൾട്ടേഷൻ ഫീസിൽ 20 ശതമാനവും ഇൻ-ഹൗസ് പരിശോധനകൾക്ക് 15 ശതമാനവും ഇളവ് ലഭിക്കും. അപ്പോളോ ഹെൽത്ത് ചെക്കപ്പുകൾക്ക് 30 ശതമാനവും ഐ.പി. ചികിത്സയ്ക്ക് 10 ശതമാനവും (നിശ്ചിത ഇനങ്ങൾ ഒഴികെ) ഇളവ് അനുവദിക്കും. കൂടാതെ ജീവനക്കാർക്കായി സൗജന്യ ആരോഗ്യ ക്ലാസുകളും മെഡിക്കൽ ക്യാമ്പുകളും ആശുപത്രിയുടെ നേതൃത്വത്തിൽ സംഘടിപ്പിക്കുമെന്നും അധികൃതർ അറിയിച്ചു.