ഡ്രൈവർമാർക്ക് ഉയർന്ന വരുമാനം;യാത്രക്കാർക്ക് കുറഞ്ഞ നിരക്ക്; കേരള സവാരി 2.0 ഇനി കൊച്ചിയിലും തുടക്കം

തിരുവനന്തപുരം :കേരള സർക്കാരിന്റെ ഓൺലൈൻ ഓട്ടോ-ടാക്‌സി സേവനമായ ‘കേരള സവാരി’ സംസ്ഥാനവ്യാപകമായി പ്രവർത്തനം ആരംഭിച്ചു. തിരുവനന്തപുരം, കൊച്ചി നഗരങ്ങളിലാണ് ആദ്യഘട്ടത്തിൽ പൂർണ്ണതോതിൽ സേവനം ആരംഭിച്ചത്.ഡ്രൈവർമാർക്ക് മികച്ച വരുമാനവും യാത്രക്കാർക്ക് കുറഞ്ഞ നിരക്കിൽ യാത്രയും ഉറപ്പാക്കുന്ന കമ്മീഷൻ രഹിത സംരംഭമാണിത്. സംസ്ഥാന സർക്കാർ നിശ്ചയിക്കുന്ന നിരക്കിലാണ് യാത്രാ നിരക്ക്.സർക്കാർ, പോലീസ്, ഗതാഗതം, ഐ.ടി. തുടങ്ങിയ വകുപ്പുകളുടെ സഹകരണത്തോടെയും ഐ.ടി.ഐ. പാലക്കാട് സ്ഥാപനത്തിന്റെ സാങ്കേതിക സഹായത്തോടെയും പദ്ധതിയെ യാഥാർത്ഥ്യമാക്കുകയായിരുന്നു. മന്ത്രി വി. ശിവൻകുട്ടിയാണ് പദ്ധതി ഇന്ന് കൊച്ചിയിൽ ഫ്‌ളാഗ് ഓഫ് ചെയ്തത്.

പദ്ധതി ആദ്യമായി തിരുവനന്തപുരം കോർപ്പറേഷൻ പരിധിയിൽ ആരംഭിച്ചിരുന്നു. പിന്നീട് കൊച്ചി, തിരുവനന്തപുരം നഗരങ്ങളിലായി ട്രയൽ റൺ നടത്തി. ഇപ്പോൾ ഈ രണ്ടു നഗരങ്ങളിലും ആപ്പിന്റെ പൂർണ്ണ സേവനം ലഭ്യമാണ്.‘കേരള സവാരി’ ആപ്പ് ഗൂഗിൾ പ്ലേസ്റ്റോറിൽ നിന്ന് ഡൗൺലോഡ് ചെയ്ത് ഉപയോഗിക്കാം. യാത്രക്കാർക്ക് സുരക്ഷ ഉറപ്പാക്കാൻ ആപ്പിൽ പാനിക് ബട്ടൺ സംവിധാനവും ഉൾപ്പെടുത്തിയിട്ടുണ്ട്.

മന്ത്രി ശിവൻകുട്ടിയുടെ വാക്കുകളിൽ, “കേരള സവാരി 2.0 പൂർണ്ണതോതിൽ പ്രവർത്തനം ആരംഭിക്കുന്നു. മറ്റേത് പ്ലാറ്റ്‌ഫോമിലും നിന്ന് വ്യത്യസ്തമായി ഇത് സബ്‌സ്‌ക്രിപ്ഷൻ രീതിയിലാണ് പ്രവർത്തിക്കുന്നത്. കമ്മീഷൻ ഇല്ലാത്തതിനാൽ ഡ്രൈവർമാർക്ക് ഉയർന്ന വരുമാനവും പൊതുജനത്തിന് കുറഞ്ഞ നിരക്കിലും സുരക്ഷിതമായ യാത്രയും ലഭ്യമാകും” എന്നായിരുന്നു അഭിപ്രായം.

കേരള സവാരിയെ ഒരു ഓട്ടോ-ടാക്‌സി ആപ്പിനതിലുപരി മൾട്ടി മോഡൽ ഗതാഗത സംവിധാനം ആപ്പായി മാറ്റുകയാണ് സർക്കാരിന്റെ ലക്ഷ്യം. മെട്രോ, വാട്ടർ മെട്രോ, മെട്രോ ഫീഡർ ബസുകൾ, ടൂറിസം, റെയിൽവേ സേവനങ്ങൾ എന്നിവയും ആപ്പിൽ 2025 ഡിസംബറോടെ ഉൾപ്പെടുത്താനാണ് പദ്ധതി.