മലങ്കര സഭാ ഭാസുരൻ പരിശുദ്ധ വട്ടശ്ശേരിൽ തിരുമേനിയുടെ ഓർമ്മപ്പെരുന്നാൾ ഫെബ്രുവരി 22 മുതൽ 28 വരെ : തീർത്ഥാടക സംഗമം 27ന്

ചിത്രം : മലങ്കര സഭാ ഭാസുരൻ പരിശുദ്ധ വട്ടശ്ശേരിൽ ഗീവർഗീസ് മാർ ദിവന്നാസിയോസ് തിരുമേനി

കോട്ടയം : മലങ്കര ഓർത്തഡോക്സ് സുറിയാനി സഭയുടെ പരിശുദ്ധനായ വട്ടശ്ശേരിൽ ഗീവർഗീസ് മാർ ദിവന്നാസിയോസ് തിരുമേനിയുടെ 92ാം ഓർമ്മപ്പെരുന്നാൾ ഫെബ്രുവരി 22 മുതൽ 28 വരെ കോട്ടയം പഴയസെമിനാരിയിൽ ആചരിക്കും. പെരുന്നാൾ ശുശ്രൂഷകൾക്ക് മലങ്കരസഭയുടെ പരമാധ്യക്ഷനും മലങ്കര മെത്രാപ്പോലീത്തായുമായ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവായും മെത്രാപ്പോലീത്താമാരും നേതൃത്വം നൽകും. ഫെബ്രുവരി 22 ഞായർ രാവിലെ 6.30ന് പ്രഭാത നമസ്ക്കാരം. 7.30ന് വിശുദ്ധ കുർബാന, തുടർന്ന് പിതാക്കൻമാരുടെ കബറിടങ്ങളിലെ ധൂപപ്രാർത്ഥനയ്ക്ക് ശേഷം ചെങ്ങന്നൂർ ഭദ്രാസനാധിപൻ ഡോ.മാത്യൂസ് മാർ തീമോത്തിയോസ് മെത്രാപ്പോലീത്താ ഓർമ്മപ്പെരുന്നാളിന് കൊടിയേറ്റും. വൈകിട്ട് 3ന് സെന്റ് ഡയനീഷ്യസ് ഓർത്തഡോക്സ് ഫെലോഷിപ്പ് കോട്ടയം ഭദ്രാസനത്തിന്റെ ആഭിമുഖ്യത്തിൽ പരിശുദ്ധന്റെ കബറിങ്കൽ അഖണ്ഡപ്രാർത്ഥന.

ഫെബ്രുവരി 23 തിങ്കൾ രാത്രി 8 ന് ചരിത്ര സെമിനാർ. വിഷയം : സത്യവിശ്വാസ സംരക്ഷകനായ പരിശുദ്ധ വട്ടശ്ശേരിൽ തിരുമേനി. സൗത്ത് വെസ്റ്റ് അമേരിക്ക ഭദ്രാസനാധിപൻ തോമസ് മാർ ഇവാനിയോസ് മെത്രാപ്പോലീത്താ അധ്യക്ഷത വഹിക്കുന്ന ചടങ്ങിൽ കൊച്ചി ഭദ്രാസനാധിപൻ ഡോ. യാക്കോബ് മാർ ഐറേനിയോസ് മെത്രാപ്പോലീത്താ മുഖ്യപ്രഭാഷണം നടത്തും. ഫെബ്രുവരി 24 ചൊവ്വ വൈകീട്ട് 6ന് സന്ധ്യാനമസ്ക്കാരം, 6.45 ന് ഗാനശുശ്രൂഷ. 7ന് കൺവൻഷൻ പ്രസംഗം ഫാ. ഡോ.വിവേക് വർഗീസ് ( ജനറൽ സെക്രട്ടറി, എം.ജി.ഒ.സി.എസ്.എം ). ഫെബ്രുവരി 25 ബുധൻ വൈകീട്ട് 6ന് സന്ധ്യാനമസ്ക്കാരം, 6.45 ന് ഗാനശുശ്രൂഷ. 7ന് കൺവൻഷൻ പ്രസംഗം ഫാ.തോമസ് രാജു ( മാനേജിംഗ് എഡിറ്റർ, മലങ്കരസഭാ മാസിക). ഫെബ്രുവരി 26 വ്യാഴം വൈകീട്ട് 6ന് സന്ധ്യാനമസ്ക്കാരം, 6.45 ന് ഗാനശുശ്രൂഷ. 7ന് കൺവൻഷൻ പ്രസംഗം ഫാ.ഡോ.റെജി മാത്യു ( മുൻ പ്രിൻസിപ്പൽ, ഓർത്തഡോക്സ് വൈദിക സെമിനാരി കോട്ടയം ).

പെരുന്നാളിന്റെ പ്രധാനദിവസമായ ഫെബ്രുവരി 27 വെള്ളി വൈകീട്ട് 6ന് സന്ധ്യാനമസ്ക്കാരം കോട്ടയം ചെറിയ പള്ളിയിൽ. തുടർന്ന് പഴയ സെമിനാരിയിലേക്ക് പ്രദക്ഷിണം. 6.45ന് സന്ധ്യാനമസ്ക്കാരം പഴയ സെമിനാരിയിൽ. പരിശുദ്ധ കാതോലിക്കാ ബാവാ മുഖ്യകാർമ്മികത്വം വഹിക്കും. മെത്രാപ്പോലീത്താമാർ സഹകാർമ്മികരാകും. 7.45ന് അനുസ്മരണ പ്രഭാഷണം : ഡോ.ഗീവർഗീസ് മാർ ബർന്നബാസ് മെത്രാപ്പോലീത്താ ( സുൽത്താൻ ബത്തേരി ഭദ്രാസനാധിപൻ ). രാത്രി 8.45ന് പ്രദക്ഷിണവും തീർത്ഥാടക സംഘങ്ങളും സെമിനാരിയിൽ എത്തിച്ചേരും. തുടർന്ന് ധൂപ പ്രാർത്ഥന, ശ്ലൈഹിക വാഴ്വ്, സ്നേഹവിരുന്ന്. രാത്രി 9ന് ഓർത്തഡോക്സ് വൈദിക സെമിനാരി ഗായക സംഘം നേതൃത്വം നൽകുന്ന ക്രിസ്തീയ ഗാനസന്ധ്യ.

ഫെബ്രുവരി 28 ശനി രാവിലെ 6.30ന് പ്രഭാത നമസ്ക്കാരം. 7.30ന് വിശുദ്ധ മൂന്നിൻമേൽ കുർബാനയ്ക്ക് മലങ്കര മെത്രാപ്പോലീത്താ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ മുഖ്യകാർമ്മികത്വം വഹിക്കും. ഡോ.യൂഹാനോൻ മാർ ക്രിസോസ്റ്റമോസ്, ഡോ.ജോഷ്വാ മാർ നിക്കോദിമോസ് എന്നിവർ സഹകാർമ്മികരാകും. തുടർന്ന് പ്രദക്ഷിണം, ധൂപപ്രാർത്ഥന, ശ്ലൈഹിക വാഴ്വ്, സ്നേഹവിരുന്ന്.

11 മണിമുതൽ വിവിധ സമ്മേളനങ്ങൾ നടക്കും. ചാപ്പലിൽ ചേരുന്ന ഭവന നിർമ്മാണ സഹായ വിതരണ സമ്മേളനം പരിശുദ്ധ കാതോലിക്കാ ബാവാ ഉദ്ഘാടനം ചെയ്യും. ഏബ്രഹാം മാർ എപ്പിഫാനിയോസ് മെത്രാപ്പോലീത്താ അധ്യക്ഷത വഹിക്കും. വൈദിക ട്രസ്റ്റി ഫാ.ഡോ.തോമസ് വർഗീസ് അമയിൽ, അൽമായ ട്രസ്റ്റി റോണി വർഗീസ് ഏബ്രഹാം, അസോസിയേഷൻ സെക്രട്ടറി അഡ്വ.ബിജു ഉമ്മൻ, ജിജു പി വർഗീസ് എന്നിവർ പ്രസംഗിക്കും.

ഓഡിറ്റോറിയത്തിൽ ചേരുന്ന മർത്തമറിയം വനിതാ സമാജത്തിന്റെ വനിതാ സംഗമം യൂഹാനോൻ മാർ പോളിക്കാർപ്പോസ് മെത്രാപ്പോലീത്താ ഉദ്ഘാടനം ചെയ്യും.ഡോ.ജോമി ജോസ് മുഖ്യപ്രഭാഷണം നടത്തും. ഫാ.ഫിലിപ്പ് തരകൻ, ഫാ.ഡോ.ജോൺ തോമസ് കരിങ്ങാട്ടിൽ, ഫാ.ജോബിൻ വർഗീസ്, പ്രൊഫ മേരി മാത്യു, ആലീസ് കോശി, വത്സമ്മ ചെറിയാൻ എന്നിവർ പ്രസംഗിക്കും.

12മണിക്ക് എക്യൂമെനിക്കൽ ഹാളിൽ സെന്റ് ഡയനീഷ്യസ് ഓർത്തഡോക്സ് ഫെലോഷിപ്പ് കേന്ദ്ര അസംബ്ലി. ഉച്ചയ്ക്ക് 2ന് പേട്രൺസ് ഡേ പരിശുദ്ധ കാതോലിക്കാ ബാവാ ഉദ്ഘാടനം ചെയ്യും. അലക്സിയോസ് മാർ യൗസേബിയോസ് മെത്രാപ്പോലീത്താ മുഖ്യപ്രഭാഷണം നടത്തും. ഗീവർഗീസ് മാർ പീലക്സിനോസ് മെത്രാപ്പോലീത്താ അധ്യക്ഷത വഹിക്കും.സഭാ സ്ഥാനികൾ, ഫാ.ബിജു ടി മാത്യു, ഷിബു കെ ഏബ്രഹാം, ഉമ്മൻ ജോൺ എന്നിവർ പ്രസംഗിക്കും.

ഒരുക്കങ്ങൾ വിലയിരുത്തുന്നതിനായി കോട്ടയം ഭദ്രാസനാധിപൻ ഡോ.യൂഹാനോൻ മാർ ദീയസ്ക്കോറോസ് മെത്രാപ്പോലീത്തായുടെ അധ്യക്ഷതയിൽ ചേർന്ന യോഗത്തിൽ ഫാ.കെ.എം.സഖറിയ, ഫാ.തോമസ് ജോർജ്, പ്രസാദ് ഏബ്രഹാം നെൽപ്പുര എന്നിവർ കൺവീനർമാരായി വിവിധ കമ്മിറ്റികൾ രൂപീകരിച്ച് പ്രവർത്തനങ്ങൾ തുടങ്ങിയതായി പഴയ സെമിനാരി മാനേജർ ഫാ.ജോബിൻ വർഗീസ് അറിയിച്ചു.