ഹെൽത്ത് ന്യൂസ്: കറുത്ത പ്ലാസ്റ്റിക് പാത്രങ്ങൾ, തവികൾ, സ്പൂണുകൾ എന്നിവയ്ക്കുള്ള ആരാധകരുടെ എണ്ണം കുറവല്ല. ആകർഷകമായ കറുപ്പ് നിറവും പുനരുപയോഗ സൗകര്യവും കാരണം വീടുകളിലും ഹോട്ടലുകളിലും ഫുഡ് ഡെലിവറി സേവനങ്ങളിലുമെല്ലാം ഇവയ്ക്ക് പ്രചാരമുണ്ട്. എങ്കിലും ഈ കറുത്ത പ്ലാസ്റ്റിക് ഉൽപ്പന്നങ്ങളുടെ പിന്നിൽ ഗുരുതരമായ ആരോഗ്യഭീഷണിയുണ്ടെന്ന് പുതിയ പഠനങ്ങൾ മുന്നറിയിപ്പ് നൽകുന്നു.പഴയ ലാപ്ടോപ്പുകൾ, സെൽഫോണുകൾ തുടങ്ങിയ പുനരുപയോഗിച്ച ഇലക്ട്രോണിക് മാലിന്യങ്ങൾ ഉപയോഗിച്ചാണ് പല കറുത്ത പ്ലാസ്റ്റിക് പാത്രങ്ങളും നിർമ്മിക്കപ്പെടുന്നത്.
ഇതിന്റെ ഫലമായി, ഈ ഉൽപ്പന്നങ്ങളിൽ ബ്രോമിനേറ്റഡ്, ഓർഗാനോഫോസ്ഫേറ്റ് ജ്വാല റിട്ടാർഡന്റുകൾ പോലുള്ള ദോഷകരമായ രാസവസ്തുക്കൾ അടങ്ങിയിരിക്കാൻ സാധ്യതയുണ്ട്.‘കെമോസ്ഫിയർ’ (Chemosphere) ജേണലിൽ പ്രസിദ്ധീകരിച്ച പഠനപ്രകാരം, അടുക്കള പാത്രങ്ങൾ ഉൾപ്പെടെ പരിശോധിച്ച കറുത്ത പ്ലാസ്റ്റിക് ഉൽപ്പന്നങ്ങളിൽ 65 ശതമാനത്തിലധികം രാസവസ്തുക്കൾ കണ്ടെത്തിയിട്ടുണ്ട്. ഇവ കാൻസർ സാധ്യത വർധിപ്പിക്കുകയും, ഹോർമോൺ പ്രവർത്തനം തടസപ്പെടുത്തുകയും, ദീർഘകാലാരോഗ്യപ്രശ്നങ്ങൾക്ക് വഴിയൊരുക്കുകയും ചെയ്യുമെന്ന് വിദഗ്ധർ മുന്നറിയിപ്പ് നൽകുന്നു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ടോക്സിക് ഫ്രീ ഫ്യൂച്ചർ സംഘടനയും ആംസ്റ്റർഡാമിലെ വ്രിജെ സർവകലാശാലയും സംയുക്തമായി നടത്തിയ പഠനത്തിൽ, കറുത്ത പ്ലാസ്റ്റിക് ഉപയോഗിച്ച് നിർമ്മിക്കുന്ന ഗാർഹിക ഉൽപ്പന്നങ്ങളിൽ ഉയർന്ന അളവിൽ ഫ്ലേം റിട്ടാർഡന്റ് കെമിക്കലുകൾ കണ്ടെത്തിയതായി പറയുന്നു.റീസൈക്കിള് ചെയ്ത പ്ലാസ്റ്റിക് ഉൽപ്പന്നങ്ങൾ സാധാരണയായി കറുത്ത നിറത്തിലാണ് ലഭിക്കുന്നത്, അതുകൊണ്ടാണ് ഈ വർഗത്തിലുള്ള പാത്രങ്ങളിൽ അപകടകരമായ രാസവസ്തുക്കൾ കൂടുതലായി അടങ്ങിയിരിക്കുന്നുവെന്ന് ഗവേഷകർ വ്യക്തമാക്കി.വിദഗ്ധർ മുന്നറിയിപ്പ് നൽകുന്നത് ഭക്ഷണം നേരിട്ട് കറുത്ത പ്ലാസ്റ്റിക് പാത്രങ്ങളിലോ സ്പൂണുകളിലോ സൂക്ഷിക്കുകയോ ചൂടാക്കുകയോ ചെയ്യുന്നത് രാസവസ്തുക്കൾ ഭക്ഷണത്തിലേക്ക് വിടർന്നു പോകാനുള്ള സാധ്യത വർധിപ്പിക്കുമെന്നതാണ്. അതിനാൽ ഇത്തരം പാത്രങ്ങൾ ഉപയോഗിക്കുന്നത് പരമാവധി ഒഴിവാക്കണമെന്ന് അവർ നിർദ്ദേശിക്കുന്നു.