കാസർഗോഡ് :കഴുത്തിൽ കഠാര ആഴ്ന്നിറങ്ങി നിലത്ത് കിടന്ന മത്സ്യവ്യാപാരിയെ രക്ഷിച്ചത് സുഹൃത്തിന്റെ ധൈര്യം. ബദിയഡുക്ക സ്വദേശി അനിൽകുമാർ (30) ആക്രമണത്തിൽ ഗുരുതരാവസ്ഥയിൽ0ട്ടപ്പോൾ, ജീവൻപോരാട്ടത്തിനിടെ കൂടെയുണ്ടായിരുന്ന ബിസിനസ് പങ്കാളി അഹമ്മദ് അൽതാഫ് (33) തന്നെയായിരുന്നു രക്ഷകനായത്. അൽതാഫ് തന്നെയാണ് രക്തസ്രാവം കനത്ത അനിലിനെ കാറിൽ കയറ്റി മംഗളൂരുവിലെ എജെ ആശുപത്രിയിൽ എത്തിച്ചത്.തിങ്കളാഴ്ച പുലർച്ചെ ഒന്നോടെ ആശുപത്രിയിലെത്തിയപ്പോൾ, കഠാര കഴുത്തിനു പിന്നിലൂടെ 10 സെൻറിമീറ്റർ ആഴത്തിൽ കുത്തിയിറങ്ങിയ നിലയിലായിരുന്നു. കൂടാതെ നെഞ്ചിലും വയറിലും കൈകളിലുമായി അഞ്ചിലധികം മുറിവുകൾ. ഈർച്ചവാളിന്റേതു പോലുള്ള മുള്ളുകളുള്ള കത്തിയായിരുന്നു ഉപയോഗിച്ചത്. ആരെങ്കിലും അത് പുറത്തെടുക്കാൻ ശ്രമിച്ചിരുന്നെങ്കിൽ രക്തക്കുഴലുകൾ മുറിഞ്ഞ് ജീവൻ അപകടത്തിലാകുമായിരുന്നു. ഭാഗ്യവശാൽ തലച്ചോറിലേക്കും സുഷുമ്നാനാഡിയിലേക്കും പോകുന്ന പ്രധാന രക്തക്കുഴലുകൾക്ക് മുറിയുണ്ടായില്ല.രണ്ട് മണിക്കൂർ നീണ്ട ശസ്ത്രക്രിയയ്ക്ക് ശേഷം കഠാര നീക്കം ചെയ്തതായി ഡോക്ടർമാർ അറിയിച്ചു. മറ്റു മുറിവുകൾ തുന്നിക്കെട്ടി.
അനിൽകുമാർ ഇപ്പോൾ അപകടനില തരണം ചെയ്തതായും ഡോക്ടർമാർ അറിയിച്ചു.കുമ്പള, ബദിയഡുക്ക പഞ്ചായത്തുകളിലെ ഹോട്ടലുകൾക്കും ചില്ലറ വ്യാപാരികൾക്കും മീൻ വിതരണം ചെയ്യുന്നയാളാണ് അനിൽ. ഞായറാഴ്ച രാത്രി ബേള സ്വദേശിയായ അക്ഷയ് (34) ഫോൺ ചെയ്താണ് സീതാംഗോളിയിലെ ഒരു ഹോട്ടലിൽ വരാൻ ആവശ്യപ്പെട്ടത്. സാമ്പത്തിക തർക്കം പരിഹരിക്കാനാണെന്ന് പറഞ്ഞതോടെ അനിൽ ബിസിനസ് പങ്കാളിയായ അൽതാഫിനെയും കൂട്ടി അൽതാഫിൻറെ ഥാർ ജീപ്പിൽ രാത്രി 11ഓടെ സീതാംഗോളിയിലെ ടികെ ഹോട്ടലിലെത്തി.അവിടെ അക്ഷയ്, മഹേഷ്, മറ്റു 11 പേർ എന്നിവർ കാത്തിരുന്നു. അവരിൽ ഏഴുപേർക്കെങ്കിലും കഠാരകളോ നീളമുള്ള കത്തികളോ കൈവശമുണ്ടായിരുന്നുവെന്ന് അൽതാഫ് പറഞ്ഞു. എത്തിയ ഉടൻ തന്നെ അവർ അനിലിനെ ജീപ്പിൽ നിന്ന് വലിച്ചിറക്കി കുത്തിക്കൊലപ്പെടുത്താൻ ശ്രമിച്ചു. അജേഷ് എന്നയാളാണ് കഴുത്തിന് പിറകിലേക്ക് കുത്തിയത്. അൽതാഫ് ഒരുവിധം അനിലിനെ രക്ഷപ്പെടുത്തി വാഹനത്തിലേറിച്ച് കുമ്ബളയിലെ സഹകരണാശുപത്രിയിൽ എത്തിച്ചു.ആശുപത്രിയിലെ ഡോക്ടർമാർ മുറിവിന്റെ ഗുരുതരത്വം കണക്കിലെടുത്ത് ഉടൻ മംഗളൂരുവിലേക്ക് മാറ്റാൻ നിർദേശിച്ചു. പിന്നീട് ആംബുലൻസിൽ എജെ ആശുപത്രിയിലേക്ക് കൊണ്ടുപോയി.അൽതാഫിന്റെ പരാതിയെ തുടർന്ന് കുമ്ബള പൊലീസ് അക്ഷയിയെ അറസ്റ്റ് ചെയ്തു. ബാക്കിയുള്ള 12 പ്രതികൾക്കായി തിരച്ചിൽ തുടരുകയാണെന്ന് പൊലീസ് അറിയിച്ചു. പ്രാഥമിക അന്വേഷണത്തിൽ രണ്ടുവർഷം മുൻപ് നടന്ന മർദ്ദന സംഭവത്തിനുള്ള പകയാണെന്ന സൂചനയും പൊലീസ് വ്യക്തമാക്കി.