അങ്കമാലിയിൽ ആറുമാസം പ്രായമുള്ള പേരക്കുട്ടിയെ കഴുത്തറുത്ത് കൊലപ്പെടുത്തിയ സംഭവം;കൊന്നത് താനെന്ന് മുത്തശ്ശി; ദേഷ്യം കാരണമായെന്ന് മൊഴി

അങ്കമാലി :ആറുമാസം പ്രായമുള്ള പേരക്കുട്ടിയെ കൊലപ്പെടുത്തിയ സംഭവത്തിൽ പ്രതിയായ അമ്മൂമ്മ കുറ്റസമ്മത മൊഴി നൽകി. കൊലപാതകം ദേഷ്യം മൂലമാണെന്നതാണ് റോസിലി (66)യുടെ മൊഴി. എങ്കിലും ആരോടാണ് ദേഷ്യം ഉണ്ടായിരുന്നതെന്ന് അവർ വ്യക്തമാക്കിയിട്ടില്ല.മാനസിക വിഭ്രാന്തി പ്രകടിപ്പിച്ച റോസിലിയെ ഇപ്പോഴും ആശുപത്രിയിൽ ചികിത്സയിലാണ്. കഴിഞ്ഞ ദിവസമാണ് ആൻ്റണി–റൂത്ത് ദമ്പതികളുടെ മകളായ ഡെൽന മരിയ സാറയെ കൊലപ്പെടുത്തിയ സംഭവം പുറത്തുവന്നത്.സഹോദരൻ ഡാനിയലിന്റെ ജന്മദിനദിനമായിരുന്നു ആ ദിവസം.

മാതാപിതാക്കൾ ഡാനിയലിനെ അങ്കണവാടിയിലേക്ക് അയക്കാനായി തയ്യാറെടുക്കുന്നതിനിടെയായിരുന്നു കുഞ്ഞ് അമ്മൂമ്മയുടെ മുറിയിൽ കൊല്ലപ്പെട്ടത്.പോലീസിനോട് നൽകിയ മൊഴിയിൽ, ദേഷ്യത്തിന്റെ തീരാവുന്ന നിമിഷത്തിലായിരുന്നു കുഞ്ഞിനെ കൊലപ്പെടുത്തിയതെന്ന് റോസിലി പറഞ്ഞു എന്നാണ് വിവരം. എന്നാൽ ദേഷ്യത്തിന് കാരണമെന്ത് എന്നത് സംബന്ധിച്ച് വ്യക്തതയില്ല.കുഞ്ഞിന്റെ കഴുത്തിൽ ആഴത്തിലുള്ള മുറിവുകളുണ്ടായിരുന്നുവെന്നും അത് കഴുത്ത് അറ്റുപോകുന്ന അവസ്ഥയിലായിരുന്നുവെന്നും പൊലീസ് പറഞ്ഞു. റോസിലിയുടെ മുറിയിൽ നിന്ന് രക്തമാലിന്യമുള്ള കത്തി പൊലീസ് പിടിച്ചെടുത്തിട്ടുണ്ട്.

മുൻകാലങ്ങളിൽ റോസിലിക്ക് സോഡിയം കുറയുന്നതിനെ തുടർന്ന് മാനസിക പ്രശ്നങ്ങൾ പ്രകടിപ്പിച്ചിട്ടുണ്ടായിരുന്നു. എന്നാൽ കുറച്ചുകാലമായി അവസ്ഥ മെച്ചപ്പെട്ട നിലയിലായിരുന്നു. കഴിഞ്ഞ ദിവസം വീണ്ടും സമാനമായ ലക്ഷണങ്ങൾ പ്രകടിപ്പിച്ചതായി കുടുംബം പൊലീസിനോട് പറഞ്ഞു. വിഷാദത്തിന് മരുന്ന് കഴിച്ചുവരികയായിരുന്നു എന്നും വിവരം.ഇപ്പോൾ പൊലീസിന്റെ ഭാഗത്ത് നിന്ന് പ്രാഥമിക മൊഴിയെടുപ്പ് മാത്രമാണ് നടന്നിരിക്കുന്നത്. റോസിലിയുടെ ആരോഗ്യനില മെച്ചപ്പെട്ട ശേഷം കൂടുതൽ വിശദമായ ചോദ്യം ചെയ്യലിനാണ് പൊലീസ് തയ്യാറെടുക്കുന്നത്.