കൊച്ചി:മലയാളചലച്ചിത്ര അഭിനേതാക്കളുടെ സംഘടനയായ അമ്മയിലെ മെമ്മറി കാർഡ് വിവാദവുമായി ബന്ധപ്പെട്ട് തെളിവെടുപ്പ് ആരംഭിച്ചു. സംഘടന രൂപീകരിച്ച അഞ്ചംഗ അന്വേഷണ സമിതിയാണ് ഇപ്പോൾ മൊഴിയെടുപ്പ് നടത്തുന്നത്.ശ്വേത മേനോൻ അധ്യക്ഷയായ കമ്മീഷനിൽ ജോയ് മാത്യു, ദേവൻ, ശ്രീലത നമ്ബൂതിരി, ശ്രീലത പരമേശ്വരൻ എന്നിവർ അംഗങ്ങളാണ്. വിവാദത്തിൽ ഉൾപ്പെട്ട നടിമാരെ വിളിച്ച് വ്യക്തമായ മൊഴിയെടുക്കൽ ആരംഭിച്ചിരിക്കുകയാണ് സമിതി.ഓഗസ്റ്റ് 21നാണ് ‘അമ്മ’ എക്സിക്യൂട്ടീവ് യോഗത്തിൽ ആഭ്യന്തര അന്വേഷണത്തിനായി അഞ്ചംഗ സമിതി രൂപീകരിച്ചത്. 60 ദിവസത്തിനുള്ളിൽ റിപ്പോർട്ട് സമർപ്പിക്കണമെന്നായിരുന്നു അന്ന് എക്സിക്യൂട്ടീവ് തീരുമാനിച്ചത്.സമീപകാല വിവാദങ്ങളെത്തുടർന്ന് സംഘടനയുടെ പ്രതിച്ഛായയ്ക്ക് നേരിട്ട ആഘാതം പരിഹരിക്കാനും ‘അമ്മ’യുടെ വിശ്വാസ്യത പുനഃസ്ഥാപിക്കാനുമാണ് അന്വേഷണം ലക്ഷ്യമിടുന്നത്. സംഘടനയുടെ അവസാന യോഗത്തിൽ തന്നെ പ്രതിഷ്ഠ പുനർനിർമ്മിക്കാൻ വേണ്ട നടപടികൾ ആലോചിച്ചിരുന്നു.കുക്കു പരമേശ്വരനുമായി ബന്ധപ്പെട്ട മെമ്മറി കാർഡ് വിവാദവും സംഘടനയിലെ വിഭാഗീയതയും ആ യോഗത്തിൽ ചർച്ചയായി. പിന്നാലെയാണ് പ്രസിഡൻറ് ശ്വേത മേനോൻ വിഷയത്തിൽ നിലപാട് വ്യക്തമാക്കി ആഭ്യന്തര അന്വേഷണ സമിതി രൂപീകരിച്ചത്.സംഘടന വിട്ടുപോയ ചില പ്രമുഖരെയും വീണ്ടും ‘അമ്മ’യിലേക്ക് തിരിച്ചുകൊണ്ടുവരാനുള്ള ശ്രമങ്ങളും ഇപ്പോൾ ശക്തമാണ്.
മെമ്മറി കാർഡ് വിവാദം: ചലച്ചിത്ര അഭിനേതാക്കളുടെ സംഘടനയായ അമ്മയിൽ തെളിവെടുപ്പ് തുടങ്ങി; അഞ്ചംഗ സമിതി അന്വേഷണം ആരംഭിച്ചു
