സ്ത്രീകൾക്ക് മാത്രം പാനി പൂരി;’ആൺകുട്ടികൾക്ക് നോ എൻട്രി’പാനി പൂരി വിപ്ലവം സമൂഹ മാധ്യമങ്ങളിൽ വൈറലാകുന്നു

ന്യൂസ്‌ ഡെസ്ക് :സമൂഹമാധ്യമങ്ങളിൽ കഴിഞ്ഞ ദിവസങ്ങളായി ഒരു പാനി പൂരി സ്റ്റാളിന്റെ ദൃശ്യങ്ങളാണ് ചിരിയും ചർച്ചയും ഒരുപോലെ സൃഷ്ടിച്ച്‌ വൈറലാകുന്നത്. സ്ത്രീകൾക്കും പെൺകുട്ടികൾക്കും മാത്രമായി തുറന്നിട്ടിരിക്കുന്ന ഈ സ്റ്റാളിന് മുന്നിൽ സ്ഥാപിച്ചിട്ടുള്ള ബോർഡാണ് ഇത്രയധികം ശ്രദ്ധ നേടാൻ കാരണം.‘ആൺകുട്ടികൾക്ക് പ്രവേശനമില്ല’ എന്ന മുന്നറിയിപ്പുള്ള ബോർഡ് കണ്ടതോടെ പലർക്കും കൗതുകം അടക്കാനായില്ല. സ്റ്റാളിന് ചുറ്റും തിങ്ങിനിറഞ്ഞ് പാനി പൂരി ആസ്വദിക്കുന്ന പെൺകൂട്ടത്തെയാണ് വൈറൽ വീഡിയോയിൽ കാണുന്നത്.

സ്റ്റാളുടമയുടെ വ്യത്യസ്തമായ കച്ചവടതന്ത്രത്തെ പ്രശംസിച്ചും, ആൺകുട്ടികൾ നേരിടുന്ന ഈ “വിവേചനം” തമാശയാക്കിയുമാണ് സോഷ്യൽ മീഡിയയിൽ കമന്റുകൾ നിറയുന്നത്. പാനി പൂരി കഴിച്ചുകൊണ്ടിരുന്ന രണ്ട് യുവതികൾ സ്റ്റാളുടമയെ നോക്കി തമാശ പറയുന്നതും ദൃശ്യങ്ങളിലുണ്ട്.“ഞങ്ങളുടെ സുരക്ഷയെക്കുറിച്ച് അങ്കിൾ എത്രമാത്രം ശ്രദ്ധിക്കുന്നു, ഇത് കേൾക്കണം ആൺകുട്ടികളെ,നിങ്ങള്‍ക്ക് ഇവിടെ വലിയ വിവേചനമാണ് നേരിടുന്നത്,” എന്ന് അവർ ചിരിച്ചുകൊണ്ട് പറയുന്ന രംഗവും വീഡിയോയിൽ ഉൾപ്പെട്ടിട്ടുണ്ട്.ഈ വേറിട്ട ആശയം സോഷ്യൽ മീഡിയയിൽ വലിയ പ്രതികരണങ്ങളാണ് സൃഷ്ടിച്ചിരിക്കുന്നത്.

ഇത് മികച്ച ഒരു മാർക്കറ്റിംഗ് തന്ത്രമാണെന്നും, സ്റ്റാളുടമയ്ക്ക് തന്റെ ഉപഭോക്താക്കളെ കൃത്യമായി അറിയാമെന്നും ചിലർ അഭിപ്രായപ്പെട്ടു.“തെരുവ് ഭക്ഷണ ലോകത്തെ ഒരു വഴിത്തിരിവ്; ഇവിടെ സുരക്ഷയും ധൈര്യവും ചേർന്നാണ് വിഭവങ്ങൾ ലഭിക്കുന്നത്,” എന്നായിരുന്നു ഒരാളുടെ രസകരമായ പ്രതികരണം.അതേസമയം, ലിംഗവിവേചനം ചൂണ്ടിക്കാട്ടി ആൺകുട്ടികൾ കോടതിയെ സമീപിക്കുമോ, അതോ ‘പാനി പൂരി പ്രതിഷേധ മാർച്ച്’ സംഘടിപ്പിക്കുമോ എന്നിങ്ങനെയുള്ള പരിഹാസ കമന്റുകളും വ്യാപകമാണ്.നെഗറ്റീവും പോസിറ്റീവുമായ പ്രതികരണങ്ങളെ ഒരുപോലെ ആകർഷിച്ച് ശ്രദ്ധ നേടാനുള്ള കച്ചവട തന്ത്രമായാണ് പലരും ഇതിനെ വിലയിരുത്തുന്നത്. എന്തായാലും, ‘ആൺകുട്ടികൾക്ക് പ്രവേശനമില്ല’ എന്ന ബോർഡോടുകൂടിയ ഈ പാനി പൂരി സ്റ്റാൾ ഇപ്പോൾ ഓൺലൈൻ ലോകത്ത് തരംഗമായി മാറിയിരിക്കുകയാണ്.