മുംബൈ : വരാനിരിക്കുന്ന അഫ്ഗാനിസ്ഥാനെതിരെയുള്ള ഏക ടെസ്റ്റ് മത്സരത്തിനും മൂന്ന് മത്സരങ്ങളടങ്ങിയ ഏകദിന (ODI) പരമ്പരയ്ക്കുമുള്ള ഇന്ത്യൻ ക്രിക്കറ്റ് ടീമിനെ ബി.സി.സി.ഐ (BCCI) ഔദ്യോഗികമായി പ്രഖ്യാപിച്ചു.യുവതാരം ശുഭ്മൻ ഗില്ലാണ് ഇരു ഫോർമാറ്റുകളിലും ഇന്ത്യൻ ടീമിനെ നയിക്കുക. ഐ.പി.എല് 2026 സീസണിന് തൊട്ടുപിന്നാലെ എത്തുന്ന പരമ്പരയായതിനാല് മുൻനിര പേസർ ജസ്പ്രീത് ബുംറ, ഓള്റൗണ്ടർ രവീന്ദ്ര ജഡേജ എന്നിവർക്ക് സെലക്ഷൻ കമ്മിറ്റി പൂർണ്ണ വിശ്രമം അനുവദിച്ചിട്ടുണ്ട്.
ടെസ്റ്റ് ഫോർമാറ്റില് ഋഷഭ് പന്തിന് പകരം കെ.എല് രാഹുലിനെ പുതിയ വൈസ് ക്യാപ്റ്റനായി നിയമിച്ചു. ഏകദിന ടീമിന്റെ വൈസ് ക്യാപ്റ്റൻ സ്ഥാനം ശ്രേയസ് അയ്യർക്കാണ്. പരിക്കിന്റെ നിഴലിലുള്ള രോഹിത് ശർമ്മ, ഹാർദിക് പാണ്ഡ്യ എന്നിവരെ ഏകദിന സ്ക്വാഡില് ഉള്പ്പെടുത്തിയിട്ടുണ്ടെങ്കിലും ഇവരുടെ പങ്കാളിത്തം ബി.സി.സി.ഐ മെഡിക്കല് സംഘത്തിന്റെ ഫിറ്റ്നസ് ക്ലിയറൻസിന് വിധേയമായിരിക്കും.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ജൂണ് 6-ന് മൊഹാലിയിലെ പുള്ളൻപൂരില് വെച്ചാണ് അഫ്ഗാനിസ്ഥാനെതിരെയുള്ള ഏക ടെസ്റ്റ് മത്സരം ആരംഭിക്കുന്നത്. ലോക ടെസ്റ്റ് ചാമ്പ്യൻഷിപ്പിന്റെ (WTC) ഭാഗമല്ലാത്തതിനാല് ആഭ്യന്തര ക്രിക്കറ്റില് മികച്ച പ്രകടനം പുറത്തെടുത്ത നിരവധി യുവതാരങ്ങള്ക്ക് ബി.സി.സി.ഐ അവസരം നല്കിയിട്ടുണ്ട്. ഗുർനൂർ ബ്രാർ, ഹർഷ് ദുബെ എന്നിവർ ടെസ്റ്റ് ടീമില് ഇടം നേടി.
ഇന്ത്യൻ ടെസ്റ്റ് ടീം: ശുഭ്മൻ ഗില് (C), യശസ്വി ജയ്സ്വാള്, കെ.എല് രാഹുല് (VC), സായ് സുദർശൻ, ഋഷഭ് പന്ത്, ദേവ്ദത്ത് പടിക്കല്, നിതീഷ് കുമാർ റെഡ്ഡി, വാഷിംഗ്ടണ് സുന്ദർ, കുല്ദീപ് യാദവ്, മുഹമ്മദ് സിറാജ്, പ്രസിദ്ധ് കൃഷ്ണ, മാനവ് സുതർ, ഗുർനൂർ ബ്രാർ, ഹർഷ് ദുബെ, ധ്രുവ് ജുറെല്.
ജൂണ് 14 മുതല് ധർമ്മശാല, ലഖ്നൗ, ചെന്നൈ എന്നിവിടങ്ങളിലായി നടക്കുന്ന ഏകദിന പരമ്പരയ്ക്കുള്ള ശക്തമായ ടീമിനെയാണ് പ്രഖ്യാപിച്ചിരിക്കുന്നത്. ഇതിഹാസ താരങ്ങളായ വിരാട് കോഹ്ലിയും രോഹിത് ശർമ്മയും ഏകദിന നിരയിലേക്ക് തിരിച്ചെത്തി. മലയാളി താരം സഞ്ജു സാംസണെ മറികടന്ന് ഇഷാൻ കിഷൻ ടീമില് ബാക്കപ്പ് വിക്കറ്റ് കീപ്പറായി ഇടംപിടിച്ചു. ആഭ്യന്തര തലത്തിലെ മികച്ച പ്രകടനത്തിലൂടെ പ്രിൻസ് യാദവ്, ഗുർനൂർ ബ്രാർ, ഹർഷ് ദുബെ എന്നിവർക്ക് ഏകദിന ടീമിലേക്ക് കന്നി വിളിയെത്തി.
ഇന്ത്യൻ ഏകദിന ടീം: ശുഭ്മൻ ഗില് (C), രോഹിത് ശർമ്മ, വിരാട് കോഹ്ലി, ശ്രേയസ് അയ്യർ (VC), കെ.എല് രാഹുല് (WK), ഇഷാൻ കിഷൻ (WK), ഹാർദിക് പാണ്ഡ്യ, നിതീഷ് കുമാർ റെഡ്ഡി, വാഷിംഗ്ടണ് സുന്ദർ, കുല്ദീപ് യാദവ്, അർഷ്ദീപ് സിംഗ്, പ്രസിദ്ധ് കൃഷ്ണ, പ്രിൻസ് യാദവ്, ഗുർനൂർ ബ്രാർ, ഹർഷ് ദുബെ. വരാനിരിക്കുന്ന 2027 ഏകദിന ലോകകപ്പിനുള്ള ടീമിനെ വാർത്തെടുക്കുന്നതിന്റെ ആദ്യ പടിയായാണ് സെലക്ടർമാർ ഈ യുവനിരയെ പരീക്ഷിക്കുന്നത്.