നാദാപുരം: നാദാപുരത്ത് വ്യാപാരികള് ഇടപെട്ട് അടപ്പിച്ചു പൂട്ടിയ തമിഴ്നാട് സ്വദേശിയുടെ കട നാട്ടുകാർ ഒത്തുചേർന്ന് തുറപ്പിച്ചു. തമിഴ്നാട് സ്വദേശിയായ വ്യാപാരിക്ക് നേരെ നടന്ന നീക്കത്തിനെതിരെ ശക്തമായ പ്രതിരോധവുമായി നാട്ടുകാർ തന്നെ നേരിട്ട് രംഗത്തിറങ്ങുകയായിരുന്നു. പ്ലാസ്റ്റിക് സാധനങ്ങള് വില്ക്കുന്ന കേന്ദ്രത്തിന് നേരെയാണ് വ്യാപാരികളുടെ ഭാഗത്തുനിന്നും നടപടിയുണ്ടായത്. നാദാപുരത്ത് പ്രവർത്തിക്കുന്ന പ്ലാസ്റ്റിക് സാധനങ്ങളുടെ വില്പന കേന്ദ്രമാണ് വ്യാപാരികള് ഇടപെട്ട് നിർബന്ധപൂർവ്വം അടപ്പിച്ചു പൂട്ടിയത്. പകല് സമയത്തായിരുന്നു വ്യാപാരികളുടെ ഈ നടപടി. എന്നാല് വിവരമറിഞ്ഞ് തമിഴ്നാട് സ്വദേശിക്ക് സംരക്ഷണവുമായി നാട്ടുകാർ ഒന്നടങ്കം രംഗത്തെത്തുകയായിരുന്നു.
വ്യാപാരികള് പകല് സമയത്ത് പൂട്ടിച്ച കട, രാത്രിയോടെ നാട്ടുകാർ തന്നെ മുൻകൈയെടുത്ത് തിരികെ തുറപ്പിച്ചു. അന്യസംസ്ഥാനത്തുനിന്നെത്തി ഇവിടെ വ്യാപാരം നടത്തുന്ന തമിഴ്നാട് സ്വദേശിക്ക് ആവശ്യമായ എല്ലാവിധ സംരക്ഷണവും തങ്ങള് നല്കുമെന്ന് നാട്ടുകാർ പരസ്യമായി പ്രഖ്യാപിക്കുകയും ചെയ്തു. വ്യാപാരികളുടെ ഏകപക്ഷീയമായ തീരുമാനത്തിനെതിരെ നാട്ടുകാരുടെ ഭാഗത്തുനിന്നുണ്ടായ ഈ പെട്ടെന്നുള്ള ഇടപെടല് പ്രദേശത്ത് വലിയ ശ്രദ്ധ പിടിച്ചുപറ്റിയിട്ടുണ്ട്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
നേരത്തെ മറ്റൊരു വീഡിയോ കണ്ടപ്പോള്, “നാദാപുരം ഇനി അങ്ങനെയൊരു രീതിയിലാകുമോ” എന്ന് ആരെങ്കിലും ചിന്തിച്ചുപോകുമോ എന്നൊരു ഭയമുണ്ടായിരുന്നു. എന്നാല് അതിനിടയിലാണ് മനസ്സിന് ഏറെ സന്തോഷം തരുന്ന ഈ ദൃശ്യങ്ങള് കാണാൻ സാധിച്ചതില് സന്തോഷമെന്ന് നിരവധി നാദാപുരത്തുകാര് കുറിപ്പുമായി എത്തി. നാദാപുരത്തുള്ള ഞാനുള്പ്പെടെ ലക്ഷക്കണക്കിന് പ്രവാസികളെപ്പോലെ തന്നെ, തന്റെ ജന്മനാടായ തമിഴ്നാട്ടില് നിന്നും നാദാപുരത്ത് വന്ന് ഒരു ചെറിയ കച്ചവടം തുടങ്ങിയതാണ് ആ പാവം മനുഷ്യൻ. ചിലർ വന്ന് അദ്ദേഹത്തെ ‘ലോക്ക്’ ചെയ്യാൻ ശ്രമിച്ചപ്പോള്, ആ മനുഷ്യന്റെ നില്പ്പും നിസ്സഹായാവസ്ഥയും കണ്ട് വല്ലാണ്ട് മനസ്സ് നൊന്തിരുന്നു. ഇപ്പോള് സന്തോഷമെന്നും കുറിപ്പില് പറയുന്നു. സംഭവത്തില് വ്യാപാരികള് ഔദ്യോഗികമായി ഇതുവരെ പ്രതികരിച്ചിട്ടില്ല.