ന്യൂഡല്ഹി:ആഴ്ചയില് അഞ്ച് പ്രവൃത്തി ദിവസമാക്കണം എന്നാവശ്യപ്പെട്ട് പൊതുമേഖല ബാങ്ക് ജീവനക്കാർ നാളെ ജനുവരി 27 ചൊവ്വാഴ്ച പണിമുടക്കും.യുണൈറ്റഡ് ഫോറം ഒഫ് ബാങ്ക് യൂണിയൻസിന്റെ (യു.എഫ്.ബി.യു) നേതൃത്വത്തിലാണ് പണിമുടക്ക്. ഇതിന്റെ പശ്ചാത്തലത്തില് പൊതുമേഖലാ ബാങ്കുകളുടെ പ്രവർത്തനം നാളെ തടസപ്പെടാൻ സാദ്ധ്യതയുണ്ട്. ജീവനക്കാരുടെ 9 സംഘടനകളുടെ കൂട്ടായ്മയാണ് യു.എഫ്.ബി.യു. ജനുവരി 23ന് ലേബർ കമ്മിഷണറുമായി നടത്തിയ ചർച്ച പരാജയപ്പെട്ടതിനെ തുടർന്നാണ് പണിമുടക്ക് പ്രഖ്യാപിച്ചത്.
നിലവില് രണ്ടാമത്തെയും നാലാമത്തെയും ശനിയാഴ്ച ബാങ്ക് ജീവനക്കാർക്ക് അവധിയാണ്. ഇത് എല്ലാ ശനിയും ആക്കണമെന്നാണ് സംഘടനകള് ആവശ്യപ്പെടുന്നത്. ഇതിനായി ദിവസവും 40 മിനിട്ട് അധികം ജോലി ചെയ്യാമെന്നും സംഘടനകള് അറിയിച്ചിരുന്നു. ഏറെ നാളായിട്ടും ആവശ്യങ്ങള് അംഗീകരിക്കാത്തതിനാലാണ് പണിമുടക്കിലേക്ക് പോകേണ്ടി വന്നതെന്ന് യൂണിയൻ നേതൃത്വം പറയുന്നു. പണം നിക്ഷേപിക്കല്, പിൻവലിക്കല്, ചെക്കുകള് പാസാക്കല്, ഭരണപരമായ നടപടികള് തുടങ്ങിയവ നാളെ തടസപ്പെടും. അതേസമയം സ്വകാര്യ ബാങ്കുകളുടെ പ്രവർത്തനങ്ങളെ പണിമുടക്ക് ബാധിക്കില്ല. .