ശരീരഭാരം കുറയുന്നില്ലെന്ന ആശങ്ക വേണ്ട; ആരോഗ്യ സംരക്ഷണത്തിന് ശ്രദ്ധിക്കേണ്ട അഞ്ച് കാര്യങ്ങൾ

ഹെൽത്ത്‌ ഡെസ്ക്:ആരോഗ്യ സംരക്ഷണം എന്ന വിഷയം ഉയരുമ്പോൾ പലരും ആദ്യം ചിന്തിക്കുന്നത് ശരീരഭാരം കുറയ്ക്കുന്നതിനെക്കുറിച്ചാണ്.പുതുവർഷം തുടങ്ങുമ്പോൾ ജിംമുകളിലെ തിരക്കും ഡയറ്റ് പ്ലാനുകൾക്കായുള്ള ഓൺലൈൻ തിരച്ചിലും വർധിക്കുന്നത് ഇതിന് തെളിവാണ്.എന്നാൽ, തൂക്കം കുറയ്ക്കുക എന്ന ഒരൊറ്റ ലക്ഷ്യത്തിന് പിന്നാലെ പായുന്നതിനെക്കാൾ ദീർഘകാല ആരോഗ്യത്തിന് സഹായിക്കുന്ന ശീലങ്ങൾ വളർത്തിയെടുക്കുകയാണ് കൂടുതൽ പ്രധാനം.ശരീരഭാരം കുറഞ്ഞാലും ഇല്ലെങ്കിലും ശാരീരികവും മാനസികവും ആയ ആരോഗ്യം മെച്ചപ്പെടുത്താൻ സഹായിക്കുന്ന അഞ്ച് പ്രധാന വഴികളാണ് ആരോഗ്യ വിദഗ്ധർ നിർദേശിക്കുന്നത്.ആദ്യമായി, ഭക്ഷണക്രമത്തിൽ സസ്യഭക്ഷണങ്ങൾക്ക് മുൻഗണന നൽകണം. പൂർണമായും സസ്യാഹാരത്തിലേക്ക് മാറണം എന്നില്ല എന്നാൽ പച്ചക്കറികൾ, പഴങ്ങൾ, മുഴധാന്യങ്ങൾ, പയർവർഗങ്ങൾ, അണ്ടിപ്പരിപ്പുകൾ എന്നിവയുടെ അളവ് കൂട്ടുന്നത് ആരോഗ്യത്തിന് ഗുണകരമാണ്. ഏകദേശം 22 ലക്ഷം ആളുകളിൽ നടത്തിയ പഠനങ്ങൾ പ്രകാരം സസ്യഭക്ഷണത്തിന് മുൻഗണന നൽകുന്നവരിൽ ടൈപ്പ്-2 പ്രമേഹം, ഹൃദ്രോഗം, കാൻസർ തുടങ്ങിയ രോഗങ്ങളുടെ സാധ്യത കുറവാണെന്ന് കണ്ടെത്തിയിട്ടുണ്ട്.

ദിവസേന 200 ഗ്രാം അധികമായി പഴങ്ങളോ പച്ചക്കറികളോ കഴിക്കുന്നത് അകാലമരണ സാധ്യത കുറയ്ക്കുമെന്നും പഠനങ്ങൾ വ്യക്തമാക്കുന്നു.രണ്ടാമതായി, വ്യായാമത്തെ ജീവിതശൈലിയുടെ ഭാഗമാക്കണം. വെറും ഭാരം കുറയ്ക്കാനുള്ള മാർഗമായി മാത്രം വ്യായാമത്തെ കാണുന്നത് ഒഴിവാക്കണം. സ്ഥിരമായ വ്യായാമം ചീത്ത കൊളസ്ട്രോൾ കുറയ്ക്കാനും നല്ല കൊളസ്ട്രോൾ വർധിപ്പിക്കാനും സഹായിക്കും. ഇതോടെ രക്തക്കുഴലുകളുടെ ഇലാസ്തികത നിലനിർത്താനും രക്തസമ്മർദം നിയന്ത്രിക്കാനും കഴിയും. കൂടാതെ, വ്യായാമം എൻഡോർഫിൻ പോലുള്ള ഹോർമോണുകളുടെ ഉത്പാദനം വർധിപ്പിക്കുന്നതിനാൽ മാനസിക സമ്മർദം കുറയുകയും നല്ല ഉറക്കം ലഭിക്കുകയും ചെയ്യും. കഠിനമായ വ്യായാമങ്ങൾക്ക് പകരം നടക്കൽ, പടികൾ കയറൽ പോലുള്ള ലളിതമായ ശീലങ്ങളും ഗുണകരമാണ്.മൂന്നാമതായി, മാനസിക സമ്മർദം നിയന്ത്രിക്കണം. ദീർഘകാലം തുടർന്നുനിൽക്കുന്ന സമ്മർദം രോഗപ്രതിരോധ ശേഷി കുറയ്ക്കുകയും രക്തസമ്മർദം വർധിപ്പിക്കുകയും ചെയ്യുന്നു.

സമ്മർദാവസ്ഥയിൽ പലരും അമിതമായി ഭക്ഷണം കഴിക്കുകയോ പോഷകമില്ലാത്ത ഭക്ഷണങ്ങൾ തിരഞ്ഞെടുക്കുകയോ ചെയ്യാറുണ്ട്.അതിനാൽ, മനസ്സിനെ ശാന്തമാക്കുന്ന പ്രവർത്തനങ്ങൾ ജീവിതത്തിന്റെ ഭാഗമാക്കുന്നത് ആരോഗ്യത്തിന് അനിവാര്യമാണ്.നാലാമതായി, ഉറക്കത്തിന് ആവശ്യമായ പ്രാധാന്യം നൽകണം.ഒരു മുതിർന്ന വ്യക്തിക്ക് ശരാശരി ഏഴ് മണിക്കൂർ ഉറക്കം അനിവാര്യമാണ്. ഉറക്കക്കുറവ് വിശപ്പ് വർധിപ്പിക്കുന്ന ഹോർമോണുകളുടെ പ്രവർത്തനം താളം തെറ്റിക്കുകയും ജങ്ക് ഫുഡുകളോടുള്ള ആസക്തി കൂട്ടുകയും ചെയ്യും. മതിയായ ഉറക്കം ഹൃദ്രോഗം, ഡിമെൻഷ്യ, വിഷാദം തുടങ്ങിയ രോഗങ്ങളിൽ നിന്ന് സംരക്ഷണം നൽകുമെന്നും വിദഗ്ധർ ചൂണ്ടിക്കാട്ടുന്നു.അവസാനമായി, മദ്യപാനം നിയന്ത്രിക്കുകയോ ഒഴിവാക്കുകയോ വേണം. മദ്യം ഹൃദയത്തെയും കരളിനെയും ദോഷകരമായി ബാധിക്കുന്നതോടൊപ്പം ആഴത്തിലുള്ള ഉറക്കത്തെയും തടസ്സപ്പെടുത്തുന്നു.

മദ്യപാനം ശരീരത്തിലെ നിയന്ത്രണങ്ങൾ കുറയ്ക്കുന്നതിനാൽ അമിതഭക്ഷണത്തിനും വഴിവെക്കുന്നു. ലഹരി ഒഴിവാക്കുന്നത് ശരീരത്തിന്റെ സ്വാഭാവിക പ്രവർത്തനങ്ങൾ വീണ്ടെടുക്കാൻ സഹായിക്കും.ആരോഗ്യം എന്നത് തൂക്കം അളക്കുന്ന യന്ത്രത്തിലെ അക്കങ്ങളിൽ ഒതുങ്ങുന്നതല്ല.നാം പിന്തുടരുന്ന ഭക്ഷണശീലങ്ങളും ജീവിതരീതികളും മാനസിക നിലയുമാണ് യഥാർത്ഥ ആരോഗ്യത്തെ നിർണയിക്കുന്നത്. ശരീരഭാരത്തിൽ മാത്രം ശ്രദ്ധ കേന്ദ്രീകരിക്കുന്നതിന് പകരം, പോഷകഗുണമുള്ള ഭക്ഷണം,വ്യായാമം,മതിയായ ഉറക്കം,സമ്മർദ നിയന്ത്രണം എന്നിവ ജീവിതത്തിന്റെ ഭാഗമാക്കിയാൽ ദീർഘകാലാടിസ്ഥാനത്തിൽ മികച്ച ആരോഗ്യം കൈവരിക്കാൻ സാധിക്കും.