ഓണറേറിയം വർധന തൃപ്തികരമല്ല:1000 രൂപ വർധന തിരഞ്ഞെടുപ്പ് കണ്ണിപ്പൊടി; സമരത്തിൽ നിന്ന് പിന്മാറില്ലെന്ന് ആശാ പ്രവർത്തകർ

തിരുവനന്തപുരം :സംസ്ഥാന സർക്കാർ ആശാ പ്രവർത്തകരുടെ ഓണറേറിയം 1000 രൂപ മാത്രം വർധിപ്പിച്ചതിനെതിരെ കടുത്ത പ്രതിഷേധവുമായി ആശാ പ്രവർത്തകർ. മന്ത്രിസഭാ യോഗത്തിൻ്റെ തീരുമാനം സ്വാഗതം ചെയ്യുമ്പോഴും, വർധനവ് തൃപ്തികരമല്ലെന്നും കുറഞ്ഞത് 3000 രൂപ എങ്കിലും വർധിപ്പിക്കണമെന്നുമാണ് ആശാ പ്രവർത്തകരുടെ ആവശ്യം.263 ദിവസമായി തലസ്ഥാനത്ത് സമരം നടത്തുന്ന ആശാ പ്രവർത്തകർ പുതിയ പ്രഖ്യാപനത്തിനെതിരെ സമരം കൂടുതൽ ശക്തമാക്കാനുള്ള തീരുമാനം അറിയിച്ചു.

പ്രതിദിനം വെറും 33 വർധന മാത്രം

സർക്കാരിന്റെ പ്രഖ്യാപനപ്രകാരം വർധന പ്രതിമാസം 1000 മാത്രമായതിനാൽ പ്രതിദിനം വെറും 33 രൂപ മാത്രമാണ് ലഭിക്കുക. “സ്ത്രീകളെ അപമാനിക്കുന്നതിന് തുല്യമാണ് ഈ 1000 രൂപയുടെ വർധന,” എന്നായിരുന്നു സമരപ്പന്തലിൽ നിന്നുള്ള ആശാ പ്രവർത്തകരുടെ പ്രതികരണം.നിലവിലെ തുച്ഛമായ പ്രതിഫലത്തിന് പുറമെ 33 രൂപ വർധന ലഭിച്ചാൽ ഒരു കുടുംബം നിലനിർത്താൻ കഴിയില്ലെന്നും, ഇതിലൂടെ ജീവിതത്തിൽ യാതൊരു മാറ്റവും ഉണ്ടാകില്ലെന്നും അവർ പറഞ്ഞു.

സമരത്തിന്റെ വിജയമെങ്കിലും ആവശ്യങ്ങൾ നിറവേറ്റിയിട്ടില്ല

ആശാ പ്രവർത്തകരുടെ പ്രധാന ആവശ്യം ഓണറേറിയം 21,000 ആയി ഉയർത്തുക എന്നതാണ്. സർക്കാർ ഭാഗത്ത് നിന്ന് ഓണറേറിയം കൂട്ടേണ്ടത് സംസ്ഥാനത്തിന്റെ ഉത്തരവാദിത്തമാണെന്ന് തെളിഞ്ഞതിലൂടെ സമരത്തിന്റെ പ്രാധാന്യം തെളിഞ്ഞുവെന്നും, എങ്കിലും വർധന തൃപ്തികരമല്ലെന്നുമാണ് ആശാ പ്രവർത്തകർ പറയുന്നത്.

സമരം തുടരും പുതിയ രൂപരേഖ നാളെ

സർക്കാരിന്റെ തീരുമാനം തൃപ്തികരമല്ലാത്തതിനാൽ സമരം തുടരുമെന്നും, സമരത്തിന്റെ പുതിയ രൂപരേഖ നാളത്തെ യോഗത്തിൽ തീരുമാനിക്കുമെന്നും നേതാക്കൾ അറിയിച്ചു. കഴിഞ്ഞ ദിവസം ക്ലിഫ് ഹൗസിന് മുന്നിൽ നടന്ന പ്രതിഷേധ മാർച്ച് മുഖേന സമരം കൂടുതൽ ശക്തമാക്കിയിരുന്നു.1000 രൂപയുടെ വർധന തിരഞ്ഞെടുപ്പ് മുന്നിൽ കണ്ടുള്ള ‘കണ്ണിപ്പൊടി ഇടൽ’ മാത്രമാണോ എന്ന സംശയവും പ്രവർത്തകർ പങ്കുവെച്ചു.

സർക്കാർ നിലപാട്

സംസ്ഥാന സർക്കാർ കടുത്ത സാമ്പത്തിക പ്രതിസന്ധി നേരിടുകയാണെന്നും, നിലവിൽ അതിൽപ്പരം വർധനവ് പ്രായോഗികമല്ലെന്നുമാണ് സർക്കാരിന്റെ നിലപാട്. ആശാ പ്രവർത്തകരുടെ ഓണറേറിയം വിഷയത്തിൽ കേന്ദ്ര സർക്കാരിനും ഉത്തരവാദിത്തമുണ്ടെന്നും, അത് നിറവേറ്റാതെ സംസ്ഥാനത്തെ മാത്രം കുറ്റപ്പെടുത്തുന്നത് നീതിയല്ലെന്നുമാണ് സർക്കാർ വൃത്തങ്ങൾ പറയുന്നത്.മുഖ്യമന്ത്രി നേരിട്ട് ചർച്ചയ്ക്ക് തയ്യാറാകാത്തതിലും ആശാ പ്രവർത്തകർ അസന്തോഷം പ്രകടിപ്പിച്ചു.