തിരുവനന്തപുരം:പ്രതിപക്ഷ നേതാവ് വി.ഡി. സതീശനൊപ്പം ശബരിമല സ്വർണക്കൊള്ള കേസിലെ പ്രതിയായ കർണാടക സ്വർണവ്യാപാരി ബെല്ലാരി ഗോവർധൻ ഉണ്ടെന്ന അവകാശവാദത്തോടെ ഒരു ചിത്രം സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. വി.ഡി. സതീശൻ മാധ്യമങ്ങളോട് സംസാരിക്കുന്നതിനിടെ അദ്ദേഹത്തിന്റെ പിന്നിലായി നിൽക്കുന്നയാളാണ് ബെല്ലാരി ഗോവർധൻ എന്ന തരത്തിലുള്ള സ്ക്രീൻഷോട്ടാണ് വൈറലായത്.എന്നാൽ, വൈറൽ ചിത്രത്തിലുള്ള വ്യക്തി ശബരിമല സ്വർണക്കൊള്ള കേസിൽ അറസ്റ്റിലായ ബെല്ലാരി ഗോവർധനല്ലെന്ന് അന്വേഷണത്തിൽ വ്യക്തമായി.ശബരിമല സ്വർണക്കൊള്ള കേസിൽ പത്താം പ്രതിയായി അറസ്റ്റിലായ ബെല്ലാരി ഗോവർധന്റെ ചിത്രം ആദ്യം പരിശോധിച്ചു.
ഈ ചിത്രവും വി.ഡി. സതീശനൊപ്പം വൈറലായ ചിത്രത്തിലുള്ള വ്യക്തിയും തമ്മിൽ വ്യക്തമായ രൂപസാദൃശ്യമില്ലെന്നത് ശ്രദ്ധയിൽപ്പെട്ടു.കൂടാതെ, വൈറൽ ചിത്രത്തിന്റെ പശ്ചാത്തലം പരിശോധിച്ചപ്പോൾ, എറണാകുളം ജില്ലയിലെ കൂനമ്മാവിൽ സ്ഥിതി ചെയ്യുന്ന സെന്റ് ഫിലോമിനാ ചർച്ചിന്റെ പാരിഷ് ഹാളാണെന്ന് സ്ഥിരീകരിച്ചു. ഈ സ്ഥലത്ത് മുൻ കേന്ദ്രമന്ത്രി കെ.വി. തോമസിന്റെ വിദ്യാധനം ട്രസ്റ്റ് സംഘടിപ്പിച്ച ഒരു പരിപാടിയിൽ പങ്കെടുക്കാനാണ് വി.ഡി. സതീശൻ എത്തിയതെന്ന് എറണാകുളത്തെ ചില യൂത്ത് കോൺഗ്രസ് പ്രവർത്തകർ വ്യക്തമാക്കി.അവരുടെ വിവരങ്ങൾ പ്രകാരം, വി.ഡി. സതീശനൊപ്പം ചിത്രത്തിലുള്ള വ്യക്തി ബെല്ലാരി ഗോവർധനല്ല. ഇയാൾ എറണാകുളം സ്വദേശിയായ കെ. റെജി കുമാറാണ്. റെജി കുമാറിന്റെ സാമൂഹ്യമാധ്യമ അക്കൗണ്ടുകളും ലഭ്യമായി.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
വിവിധ രാഷ്ട്രീയ-സാംസ്കാരിക നേതാക്കളോടൊപ്പം ഉള്ള ചിത്രങ്ങൾ അദ്ദേഹം തന്റെ ഫെയ്സ്ബുക്ക് പേജിൽ പങ്കുവച്ചിട്ടുമുണ്ട്.ലഭ്യമായ വിവരങ്ങളും ദൃശ്യപരമായ പരിശോധനയും അടിസ്ഥാനമാക്കി, പ്രതിപക്ഷ നേതാവ് വി.ഡി. സതീശനൊപ്പം വൈറലായ ചിത്രത്തിലുള്ള വ്യക്തി ശബരിമല സ്വർണക്കൊള്ള കേസിൽ അറസ്റ്റിലായ ബെല്ലാരി ഗോവർധനല്ലെന്നും, കൊച്ചി സ്വദേശിയായ കെ. റെജി കുമാറാണെന്നും വ്യക്തമായി.