തൃശൂർ : തൃശ്ശൂർ പൂരം നടത്തിപ്പില് ജനവികാരം പരിഗണിക്കുമെന്ന് പാറമേക്കാവ് ദേവസ്വം സെക്രട്ടറി ജി രാജേഷ്. ജില്ല ഭരണകൂടവുമായി ആലോചിക്കുമെന്ന് രാജേഷ് വ്യക്തമാക്കി. സർക്കാർ തീരുമാനം അനുസരിക്കുമെന്നും വിശദമായ അന്വേഷണം നടക്കട്ടെയെന്നും ജി രാജേഷ് പറഞ്ഞു. ജില്ലാ ഭരണകൂടവുമായി ആലോചിച്ച് തുടർ നടപടി തീരുമാനിക്കും. ദുരന്തം ഉണ്ടായപ്പോള് ജനങ്ങളുടെ വികാരം കൂടി പരിഗണിക്കണം. ജില്ലാ ഭരണകൂടം എന്തുപറയുന്നു അക്കാര്യം അനുസരിക്കും. സർക്കാർ നിർദ്ദേശം, ജനവികാരം കണക്കില് എടുത്ത് ഉചിതമായ തീരുമാനം ഉണ്ടാകുമെന്നും അദ്ദേഹം പറഞ്ഞു.
എല്ലാ ഒരുക്കങ്ങളും പൂർത്തിയാക്കിയ ശേഷമാണ് ഈ ഒരു ദുരന്തം ഉണ്ടാകുന്നത്. തിരുവമ്ബാടിയുടെ ദുഃഖത്തില് പങ്കുചേരുന്നു. മരിച്ചവരുടെ കുടുംബങ്ങള്ക്ക് ഒപ്പമാണ്. സർക്കാർ എന്തു പറയുന്നു അത് അനുസരിക്കുക എന്നുള്ളതാണ് ഉത്തരവാദിത്തപ്പെട്ട ആളുകള് എന്ന നിലയില് തങ്ങളുടെ തീരുമാനമെന്നും ജി രാജേഷ് വ്യക്തമാക്കി. വിശദമായ അന്വേഷണം നടക്കട്ടെ. പാറമേക്കാവ് ദേവസ്വം ഇന്ന് വൈകിട്ട് ആഘോഷ കമ്മിറ്റിയുടെ യോഗം ചേരുന്നുണ്ട്. ആ യോഗത്തില് കാര്യങ്ങള് ചർച്ച ചെയ്യും. തുടർന്ന് തിരുവമ്ബാടിയുമായും കൂടിയാലോചിക്കുമെന്നും പാറമേക്കാവ് ദേവസ്വം സെക്രട്ടറി ജി രാജേഷ് പറഞ്ഞു.