എറണാകുളം:നെല്ല് സംഭരണവുമായി ബന്ധപ്പെട്ട് സിപിഐ മന്ത്രിമാർ വിളിച്ച യോഗത്തിൽ നിന്ന് മുഖ്യമന്ത്രി പിണറായി വിജയൻ ഇറങ്ങി. എറണാകുളത്ത് ഭക്ഷ്യ സിവിൽ സപ്ലൈസ് വകുപ്പ് വിളിച്ച യോഗം, മില്ലുടമകൾ ഇല്ലെന്ന കാരണത്താൽ വെറും അഞ്ച് മിനിറ്റിൽ മുഖ്യമന്ത്രി അവസാനിപ്പിച്ചു.സിപിഐ ഭരിക്കുന്ന ഭക്ഷ്യ സിവിൽ സപ്ലൈസ് വകുപ്പാണ് യോഗം വിളിച്ചത്. സിപിഐ മന്ത്രിമാരായ ജി. ആർ. അനിൽ, കൃഷിമന്ത്രി പി. പ്രസാദ് എന്നിവർക്കൊപ്പം ധനമന്ത്രി കെ. എൻ. ബാലഗോപാൽ, വൈദ്യുതി മന്ത്രി കെ. കൃഷ്ണൻകുട്ടി, ഉന്നത ഐ.എ.എസ്. ഉദ്യോഗസ്ഥർ തുടങ്ങിയവരും യോഗത്തിൽ പങ്കെടുത്തിരുന്നു.
യോഗം ആരംഭിച്ച ഉടൻതന്നെ “മില്ലുടമകൾ എവിടെയുണ്ട്?” എന്ന് മുഖ്യമന്ത്രി ചോദിച്ചു. അവരെ വിളിച്ചിട്ടില്ലെന്നും ഇന്ന് ഉദ്യോഗസ്ഥതല യോഗം മാത്രമാണെന്നും ഭക്ഷ്യമന്ത്രി മറുപടി നൽകി. ഇത് കേട്ട് അസന്തുഷ്ടനായ മുഖ്യമന്ത്രി, “മില്ലുടമകൾ ഇല്ലാതെ എന്തിനാണ് ഈ ചർച്ച?” എന്ന് ചോദിച്ചു.യോഗത്തിന്റെ അജണ്ട മുഖ്യമന്ത്രിയുടെ ഓഫീസിനെ നേരത്തെ അറിയിച്ചിരുന്നുവെന്ന് മന്ത്രിമാർ വ്യക്തമാക്കിയെങ്കിലും, മുഖ്യമന്ത്രി അതിൽ ചെവികൊടുത്തില്ല.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
തുടർന്ന് അദ്ദേഹം യോഗം അവസാനിപ്പിച്ച് മടങ്ങുകയായിരുന്നു.പിന്നീട്, മില്ലുടമകളെയും ഉൾപ്പെടുത്തി നാളെ വൈകിട്ട് നാല് മണിക്ക് തിരുവനന്തപുരം മുഖ്യമന്ദിരത്തിൽ വീണ്ടും കാണാമെന്ന് പറഞ്ഞാണ് അദ്ദേഹം യോഗം വിടുന്നത്.അതേസമയം, യോഗത്തിൽ നിന്ന് മുഖ്യമന്ത്രിയുടെ ഇറക്കം സംബന്ധിച്ച മാധ്യമ ചോദ്യങ്ങൾക്ക് സിപിഐ മന്ത്രിമാർ മറുപടി നൽകി —തർക്കമുണ്ടായിരുന്നുവെങ്കിൽ ഞങ്ങൾ യോഗത്തിന് എത്തിയേനെ എന്നില്ലല്ലോ” എന്നായിരുന്നു അവരുടെ പ്രതികരണം.