മക്ക:സൗദിയിലെ പടിഞ്ഞാറൻ പ്രവിശ്യയിൽ പെയ്ത കനത്ത മഴ ഗതാഗതത്തെ കാര്യമായി ബാധിച്ചു. ഗ്രാൻഡ് മസ്ജിദ് ഉൾപ്പെടുന്ന മധ്യ മക്കയിൽ ശക്തമായ കാറ്റ് അനുഭവപ്പെട്ടപ്പോൾ, നഗരത്തിലെ നിരവധി റോഡുകൾ വെള്ളപ്പൊക്കത്തിൽ മുങ്ങി. പാർക്ക് ചെയ്തിരുന്ന നിരവധി വാഹനങ്ങൾ വെള്ളത്തിന്റെ പ്രവാഹത്തിൽ ഒലിച്ചുപോയതായി ദൃശ്യങ്ങളിൽ കാണുന്നു.മക്കയും പരിസര പ്രദേശങ്ങളും ഉൾപ്പെടെ ദേശീയ കാലാവസ്ഥാ നിരീക്ഷണ കേന്ദ്രം റെഡ് അലർട്ട് പ്രഖ്യാപിച്ചിട്ടുണ്ട്. പ്രത്യേകിച്ച് ദക്ഷിണ മക്കയിലെ ദിഫാഖ് ജില്ലയിലാണ് പൊടിക്കാറ്റും പേമാരിയും ഗുരുതര നാശനഷ്ടങ്ങൾ വരുത്തിയത്.
താഴ്ന്ന പ്രദേശങ്ങൾ, താഴ്വരകൾ, തുരങ്കങ്ങൾ എന്നിവിടങ്ങളിൽ പോകുന്നത് ഒഴിവാക്കണമെന്നും, അപകടസാധ്യതയുള്ള താഴ്ന്ന പ്രദേശങ്ങളിൽ താമസിക്കുന്നവർ സുരക്ഷിത സ്ഥലങ്ങളിലേക്ക് മാറണമെന്നും അധികൃതർ മുന്നറിയിപ്പ് നൽകി.കാലാവസ്ഥാ നിരീക്ഷണ കേന്ദ്രത്തിന്റെ പ്രകാരം, തിങ്കളാഴ്ച വരെ വിവിധ പ്രദേശങ്ങളിൽ ശക്തമായ മഴയും പൊടിക്കാറ്റും തുടരുമെന്നാണ് പ്രവചിക്കുന്നത്. ദൂരക്കാഴ്ച കുറയുന്നതിനാൽ മക്ക, ജിദ്ദ, തായിഫ് എന്നിവിടങ്ങളിലുള്ളവർ പ്രത്യേക ജാഗ്രത പാലിക്കണമെന്ന് നിർദേശമുണ്ട്.