വന്ദേ ഭാരത് സ്ലീപ്പറിൽ ചൂടുവെള്ള സൗകര്യം; യാത്രക്കാർക്ക് കൂടുതൽ ആഡംബര അനുഭവം

ന്യൂഡൽഹി :ദീർഘദൂര യാത്രകളിൽ കുളിക്കാനുള്ള ബുദ്ധിമുട്ട് ഇനി ചരിത്രമാകാൻ പോകുന്നു. വരാനിരിക്കുന്ന വന്ദേ ഭാരത് സ്ലീപ്പർ ട്രെയിനുകളിൽ യാത്രക്കാർക്ക് ചൂടുവെള്ളം ഉപയോഗിച്ച് കുളിക്കാനുള്ള സൗകര്യം ഒരുക്കാൻ റെയിൽവേ തീരുമാനിച്ചു. ഫസ്റ്റ് എ.സി. യാത്രക്കാർക്ക് ഈ സൗകര്യം പൂർണ്ണമായും സൗജന്യമായിരിക്കും. ടിക്കറ്റ് നിരക്കിൽ തന്നെ ഈ സേവനം ഉൾപ്പെടുത്തിയിട്ടുണ്ട്.ലോകത്തിലെ ഏറ്റവും വലിയ റെയിൽ ശൃംഖലകളിലൊന്നായ ഇന്ത്യൻ റെയിൽവേയിൽ ദിവസേന ദശലക്ഷക്കണക്കിന് ആളുകളാണ് യാത്ര ചെയ്യുന്നത്. എന്നാൽ ദീർഘദൂര ട്രെയിനുകളിലെ സ്ലീപ്പർ കോച്ചുകളിൽ കുളിക്കാനുള്ള അടിസ്ഥാന സൗകര്യങ്ങളുടെ അഭാവം ഇപ്പോഴും നിലനിൽക്കുന്നുണ്ട്. ഇടുങ്ങിയതും വൃത്തിഹീനവുമായ ശുചിമുറികളിൽ പരിമിതമായ തണുത്ത വെള്ളം മാത്രമുള്ള അവസ്ഥയിൽ യാത്ര ചെയ്യേണ്ടിവരുന്നത് യാത്രക്കാരെ ബുദ്ധിമുട്ടിച്ചിരുന്ന സാഹചര്യം മാറാനാണ് ഈ പുതിയ പദ്ധതി ലക്ഷ്യമിടുന്നത്.

ഓട്ടോമാറ്റിക് ഡോറുകൾ, ആധുനിക ഇൻറ്റീരിയർ, അത്യാധുനിക സുരക്ഷാ സംവിധാനങ്ങൾ തുടങ്ങിയവയ്‌ക്കൊപ്പം ചൂടുവെള്ള സൗകര്യവും വന്ദേ ഭാരത് ട്രെയിനുകളിലെ പുതിയ ആകർഷണമായിരിക്കും. നിലവിൽ രാജധാനി, ദുരന്തോ തുടങ്ങിയ ചില പ്രീമിയം ട്രെയിനുകളിലെ ഫസ്റ്റ് എ.സി. കോച്ചുകളിലാണ് ചൂടുവെള്ളം ലഭ്യമാക്കിയിട്ടുള്ളത്.

2026-ഓടെ സർവീസ് ആരംഭിക്കാം

തദ്ദേശീയമായി രൂപകൽപ്പന ചെയ്ത ആദ്യ സെമി-ഹൈസ്പീഡ് ഓവർനൈറ്റ് ട്രെയിനായ വന്ദേ ഭാരത് സ്ലീപ്പർ ഇപ്പോൾ സുരക്ഷാ പരിശോധനകളുടെ അവസാന ഘട്ടത്തിലാണ്. പരീക്ഷണ ഘട്ടത്തിൽ കണ്ടെത്തിയ ചെറിയ ഡിസൈൻ, സുരക്ഷാ പ്രശ്നങ്ങൾ പരിഹരിച്ച ശേഷം 2026-ഓടെ വാണിജ്യ സർവീസ് ആരംഭിക്കാനാണ് സാധ്യത.കവച്ച് 4.0 ആന്റി-കൊളിഷൻ സംവിധാനം ഉൾപ്പെടെ നിരവധി നൂതന സുരക്ഷാ സംവിധാനങ്ങൾ ട്രെയിനിന്റെ പ്രത്യേകതകളിൽപ്പെടുന്നു.

യാത്രക്കാരുടെ സൗകര്യത്തിനായി വിശാലമായ കുഷ്യൻ ബെർത്തുകൾ, റീഡിംഗ് ലൈറ്റുകൾ, യുഎസ്ബി ചാർജിംഗ് പോയിന്റുകൾ, സെൻസർ അടിസ്ഥാനത്തിലുള്ള ലൈറ്റിംഗ്, ശബ്ദം കടക്കാത്ത ഇൻറ്റീരിയറുകൾ, ഓരോ കോച്ചിലും മൂന്ന് വിശ്രമമുറികൾ (ഒന്ന് ഭിന്നശേഷിക്കാർക്കായി പ്രത്യേകമായി) എന്നിവയും ഒരുക്കിയിട്ടുണ്ട്.2024 സെപ്റ്റംബറിൽ ബാംഗ്ലൂരിലെ (BEML) ൽ നിന്നാണ് വന്ദേ ഭാരത് സ്ലീപ്പറിന്റെ പ്രോട്ടോടൈപ്പ് പുറത്തിറക്കിയത്.ഓരോ ട്രെയിൻ സെറ്റിനും ഏകദേശം 120 കോടി രൂപ ചെലവായേക്കും.

പൂർണ്ണ ഉത്പാദനം 2025 ജൂണിൽ ആരംഭിക്കാനായിരുന്നു പദ്ധതി, എന്നാൽ ചില സാങ്കേതിക പ്രശ്നങ്ങൾ കാരണം അത് വൈകുകയായിരുന്നു. ആദ്യ രണ്ട് റേക്കുകൾ 2025 ഒക്ടോബറോടെ തയ്യാറായെങ്കിലും, ആർഡിഎസ്‌ഒ ചൂണ്ടിക്കാട്ടിയ അഗ്നിസുരക്ഷാ പോരായ്മകൾ, ബെർത്തുകളുടെ മൂർച്ചയേറിയ ഭാഗങ്ങൾ, കവച്ച് സംവിധാനത്തിന്റെ അപൂർണ്ണ സംയോജനം തുടങ്ങിയ കാരണങ്ങളാൽ ലോഞ്ച് 2026-ലേക്ക് നീണ്ടു.ജോധ്പൂരിൽ ട്രെയിനിന് പ്രത്യേക മെയിൻറനൻസ് ഡിപ്പോയുടെ നിർമ്മാണം പുരോഗമിക്കുകയാണ്. ഇത് 2026 ജൂണോടെ പൂർത്തിയാകുമെന്നാണ് പ്രതീക്ഷ. മുംബൈ–അഹമ്മദാബാദ്, ഡൽഹി ഹൗറ തുടങ്ങിയ ഉയർന്ന ഡിമാൻഡുള്ള റൂട്ടുകളിലാണ് ആദ്യഘട്ട സർവീസ് ആരംഭിക്കാൻ സാധ്യത.