പനി മാറിയിട്ടും ചുമ വിട്ടുമാറുന്നില്ലേ? അവഗണിക്കരുത് ഈ ലക്ഷണങ്ങൾ

ഹെൽത്ത്‌ ഡെസ്ക്:പനി മാറിയിട്ടും വിട്ടുമാറാത്ത ചുമ പലരെയും അലട്ടുന്ന ഒരു സാധാരണ ആരോഗ്യപ്രശ്‌നമായി മാറുകയാണ്.ശൈത്യകാലം ആരംഭിച്ചതോടെ പനി, ജലദോഷം, കനത്ത ചുമ തുടങ്ങിയ ലക്ഷണങ്ങളോടെ നിരവധി പേർ ചികിത്സ തേടുന്നുണ്ട്. സാധാരണയായി നാലോ അഞ്ചോ ദിവസത്തിനുള്ളിൽ പനിയും ജലദോഷവും മാറുമ്പോഴും, ചുമ മാത്രം ആഴ്ചകളോളം തുടരുന്ന സാഹചര്യം പലർക്കും അനുഭവപ്പെടുന്നുണ്ട്.വൈദ്യശാസ്ത്രത്തിൽ ഈ അവസ്ഥയെ ‘പോസ്റ്റ് ഇൻഫെക്ഷ്യസ് കഫ്’ (Post-infectious cough) എന്നാണ് വിളിക്കുന്നത്. പനി ഉണ്ടാക്കുന്ന വൈറസുകൾ ശരീരത്തിൽ പ്രവേശിക്കുമ്പോൾ ശ്വാസനാളത്തിലെ കോശങ്ങളെ ബാധിക്കുകയും നശിപ്പിക്കുകയും ചെയ്യുന്നു. പനി മാറിയ ശേഷവും ഈ കോശങ്ങൾ പൂർണമായി സുഖം പ്രാപിക്കാൻ സമയമെടുക്കുന്നതിനാൽ ശ്വാസനാളം അതീവ സെൻസിറ്റീവായി തുടരുന്നു. ഇതാണ് ചെറിയ വായുസഞ്ചാരമോ തണുത്ത കാറ്റോ പൊടിപടലങ്ങളോ പോലും ചുമയ്ക്ക് കാരണമാകുന്നത്.

പനി മാറിയിട്ടും ശ്വാസകോശത്തിനുള്ളിൽ കഫം അവശേഷിക്കുന്നുണ്ടെങ്കിൽ, അത് പുറത്താക്കാനുള്ള ശരീരത്തിന്റെ സ്വാഭാവിക ശ്രമമായും ചുമ തുടരാൻ ഇടയാക്കുന്നു. കൂടാതെ, പനിക്ക് ശേഷം ഉണ്ടാകുന്ന ‘പോസ്റ്റ് നേസൽ ഡ്രിപ്പ്’ എന്ന അവസ്ഥയും ചുമയ്ക്ക് കാരണമാകാം. മൂക്കിനുള്ളിലെ ദ്രാവകം തൊണ്ടയുടെ പിൻഭാഗത്തേക്ക് ഒഴുകുന്നത് തൊണ്ടയിൽ അസ്വസ്ഥത ഉണ്ടാക്കുകയും തുടർച്ചയായ ചുമ പ്രേരിപ്പിക്കുകയും ചെയ്യുന്നു. ആസ്ത്മ, അലർജി തുടങ്ങിയ പ്രശ്‌നങ്ങളുള്ളവരിൽ ഈ ചുമ കൂടുതൽ കാലം നീണ്ടുനിൽക്കാൻ സാധ്യതയുണ്ടെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു.

ഈ അവസ്ഥ നിയന്ത്രിക്കാൻ ചില ലളിതമായ മുൻകരുതലുകൾ സ്വീകരിക്കാവുന്നതാണെന്ന് ഡോക്ടർമാർ പറയുന്നു. ധാരാളം വെള്ളം കുടിക്കുന്നത് കഫം അലിയിക്കാനും ശ്വാസനാളത്തിലെ ഈർപ്പം നിലനിർത്താനും സഹായകമാണ്. ഉപ്പുവെള്ളം ഉപയോഗിച്ച് തൊണ്ട കുലുക്കുഴിയുന്നത് തൊണ്ടയിലെ നീർക്കെട്ട് കുറയ്ക്കാൻ ഫലപ്രദമാണ്. ഉറങ്ങുന്നതിന് മുൻപ് ഒരു ടീസ്പൂൺ തേൻ കഴിക്കുന്നത് ചുമ കുറയ്ക്കാൻ സഹായിക്കുന്നതായി പഠനങ്ങൾ വ്യക്തമാക്കുന്നു. ആവി പിടിക്കൽ ശ്വസനതടസ്സം കുറയ്ക്കാനും കഫം പുറത്താക്കാനും സഹായകരമാണ്.ജീവിതശൈലിയിലെ മാറ്റങ്ങളും ഈ ഘട്ടത്തിൽ നിർണായകമാണ്. പുകവലി, പൊടിപടലങ്ങൾ, രൂക്ഷമായ ഗന്ധമുള്ള പെർഫ്യൂമുകൾ, എസിയുള്ള മുറികളിൽ ദീർഘസമയം ചെലവഴിക്കുന്നത് എന്നിവ ഒഴിവാക്കണമെന്ന് ആരോഗ്യവിദഗ്ധർ നിർദ്ദേശിക്കുന്നു.

കിടക്കുമ്പോൾ തല അല്പം ഉയർത്തി ഉറങ്ങുന്നത് ചുമയും ശ്വാസം മുട്ടലും കുറയ്ക്കാൻ സഹായിക്കും. തണുത്ത ഭക്ഷണങ്ങളും പാനീയങ്ങളും ഒഴിവാക്കി, ഇഞ്ചി, കുരുമുളക്, തുളസി എന്നിവ ചേർത്ത ചൂടുവെള്ളം ഉപയോഗിക്കുന്നത് ശ്വാസകോശത്തിന്റെ ആരോഗ്യം മെച്ചപ്പെടുത്താൻ ഗുണകരമാണെന്നും വിദഗ്ധർ ചൂണ്ടിക്കാട്ടുന്നു.പനിക്ക് ശേഷമുള്ള ചുമ മിക്കപ്പോഴും താൽക്കാലികവും ഗുരുതരമല്ലാത്തതുമാണെങ്കിലും, ചുമ മൂന്നാഴ്ചയ്ക്കും മേൽ തുടർന്നാൽ ജാഗ്രത ആവശ്യമാണെന്ന് ഡോക്ടർമാർ മുന്നറിയിപ്പ് നൽകുന്നു. ചുമയ്‌ക്കൊപ്പം രക്തം വരിക, ശ്വാസംമുട്ടൽ, നെഞ്ചുവേദന തുടങ്ങിയ ലക്ഷണങ്ങൾ പ്രകടമാകുന്നുണ്ടെങ്കിൽ ഉടൻ തന്നെ വൈദ്യസഹായം തേടണം. കൃത്യമായ പരിചരണവും മുൻകരുതലുകളും സ്വീകരിച്ചാൽ ഈ അവസ്ഥയെ എളുപ്പത്തിൽ മറികടക്കാനാകുമെന്ന് ആരോഗ്യവിദഗ്ധർ വ്യക്തമാക്കുന്നു.