ശരീരം ഭാരം കുറക്കാനും, ചർമ്മത്തിന് തിളക്കം നൽകാനും സഹായിക്കുന്ന നെയ്യ്; ദിനംപ്രതി ഒരു സ്പൂൺ നൽകുന്ന ആരോഗ്യഗുണങ്ങൾ

ഹെൽത്ത്‌ ഡെസ്ക്:നമ്മുടെ ദിനചര്യയിലും ഭക്ഷണശീലങ്ങളിലും ചെറുതായി വരുത്തുന്ന മാറ്റങ്ങൾ ആരോഗ്യത്തിൽ വലിയ ഗുണങ്ങൾ സമ്മാനിക്കും. അത്തരത്തിലൊന്നാണ് നെയ്യ്. ആരോഗ്യകരമായ കൊഴുപ്പുകൾ, ആവശ്യമായ വിറ്റാമിനുകൾ, ആന്റിഓക്‌സിഡന്റുകൾ എന്നിവയാൽ സമ്പന്നമായ നെയ്യ് ശരീരത്തിന് നിരവധി ഗുണങ്ങൾ നൽകുന്നതായി പഠനങ്ങളും ആയുര്‍വേദവും ചൂണ്ടിക്കാട്ടുന്നു.ദിവസവും ഒന്നോ രണ്ടോ ടീസ്പൂൺ നെയ്യ് കഴിക്കുന്നത് ദഹനം മെച്ചപ്പെടുത്താനും പ്രതിരോധശേഷി വർധിപ്പിക്കാനും ഊർജ്ജനില ഉയർത്താനും സഹായിക്കും. എളുപ്പം ദഹിക്കുന്ന ഭക്ഷണഘടകമായതിനാൽ അസിഡിറ്റിയും മലബന്ധവും അനുഭവപ്പെടുന്നവർക്ക് നെയ്യ് ഗുണകരമാണ്.

ദഹനത്തിനും കുടൽ ആരോഗ്യത്തിനും

നെയ്യ് കുടലിന്റെ പാളികളെ പോഷിപ്പിക്കുകയും മലവിസർജനം ക്രമപ്പെടുത്തുകയും ചെയ്യുന്നു. ബ്യൂട്ടിറിക് ആസിഡ് അടങ്ങിയ നെയ്യ് കുടലിലെ വീക്കം കുറയ്ക്കുന്നതിനും ആന്തര ആരോഗ്യത്തെ പിന്തുണയ്ക്കുന്നതിനും സഹായിക്കുമെന്ന് ആയുര്‍വേദം പറയുന്നു.

രോഗപ്രതിരോധ ശേഷിക്ക്

വിറ്റാമിൻ എ, ഡി, ഇ, കെ എന്നിവയും ആന്റിഓക്‌സിഡന്റുകളും അടങ്ങിയ നെയ്യ് ശരീരത്തിന്റെ പ്രതിരോധശേഷി ശക്തിപ്പെടുത്തുകയും അണുബാധകളിൽ നിന്ന് സംരക്ഷണം നൽകുകയും ചെയ്യുന്നു.

ഓർമ്മശക്തിയും മസ്തിഷ്‌ക പ്രവർത്തനവും

നെയ്യിലെ ആരോഗ്യകരമായ കൊഴുപ്പുകൾ തലച്ചോറിലെ കോശങ്ങളുടെ പ്രവർത്തനത്തെ പിന്തുണയ്ക്കുന്നു. ശ്രദ്ധയും ഓർമ്മശക്തിയും മെച്ചപ്പെടുത്താൻ ഇത് സഹായിക്കുമെന്നാണ് ആയുര്‍വേദത്തിലെ വിലയിരുത്തൽ.

ഹൃദയാരോഗ്യത്തിന്

മിതമായ അളവിൽ നെയ്യ് ഉപയോഗിക്കുന്നത് നല്ല കൊളസ്ട്രോളായ എച്ച്ഡിഎൽ നിലനിർത്താനും ദോഷകരമായ എൽഡിഎൽ കൊളസ്ട്രോൾ കുറയ്ക്കാനും സഹായിക്കുമെന്ന് ചില പഠനങ്ങൾ സൂചിപ്പിക്കുന്നു.

ശരീരഭാരം കുറക്കാൻ

ശരീരഭാരം കുറയ്ക്കാൻ ശ്രമിക്കുന്നവർക്ക് രാവിലെ വെറും വയറ്റിൽ ഒരു സ്പൂൺ നെയ്യ് കഴിക്കുന്നത് ഗുണകരമാണ്. ഇത് വിശപ്പ് നിയന്ത്രിക്കാനും പോഷകങ്ങളുടെ ശരിയായ ആഗിരണം ഉറപ്പാക്കാനും സഹായിക്കും.

ചർമ്മത്തിനും അസ്ഥികൾക്കും

നെയ്യിലെ അവശ്യ ഫാറ്റി ആസിഡുകളും വിറ്റാമിനുകളും ചർമ്മത്തിന് സ്വാഭാവിക തിളക്കം നൽകും. കൂടാതെ വിറ്റാമിൻ കെ കാൽസ്യം ശരീരത്തിൽ ആഗിരണം ചെയ്യാൻ സഹായിക്കുന്നതിനാൽ അസ്ഥികളും സന്ധികളും ശക്തമാകും.അതേസമയം, നെയ്യ് അമിതമായി ഉപയോഗിക്കുന്നത് ആരോഗ്യത്തിന് ദോഷകരമാകാം. അതിനാൽ ദിവസവും ഒന്നോ രണ്ടോ ടീസ്പൂൺ എന്ന അളവിൽ മാത്രം ഉപയോഗിക്കുന്നതാണ് ആരോഗ്യകരം