വയറുവേദനയും അതിരില്ലാത്ത ക്ഷീണവും: അണ്ഡാശയ അർബുദം മൂലം ശ്രദ്ധിക്കേണ്ട സൂചനകൾ

ഹെൽത്ത് ന്യൂസ്:അണ്ഡാശയത്തിലും ഫാലോപ്യൻ ട്യൂബുകളിലുമായി അസാധാരണ കോശങ്ങൾ നിയന്ത്രണാതീതമായി വളരുമ്പോഴാണ് അണ്ഡാശയ അർബുദം ഉണ്ടാകുന്നത്. ഈ കോശങ്ങൾ വേഗത്തിൽ വളരുകയും ശരീരത്തിലെ ആരോഗ്യകരമായ തന്തുക്കളെ ആക്രമിക്കുകയും നശിപ്പിക്കുകയും ചെയ്യുന്നു. ഓങ്കോളജിസ്റ്റുകൾ പറയുന്നതനുസരിച്ച്, 40-50 വയസ്സിനിടയിൽ പ്രായമുള്ള ഇന്ത്യൻ സ്ത്രീകളിൽ ഇത് കൂടുതലായി കാണപ്പെടുന്നു.

എന്തുകൊണ്ടാണ് ഈ വർദ്ധനവ് ?

ജീവിതശൈലിയിൽ വരുന്ന മാറ്റങ്ങൾ, അമിതവണ്ണം, ഹോർമോൺ അസന്തുലിതാവസ്ഥ, പ്രസവം വൈകിപ്പിക്കൽ, പിസിഒഎസ് (പോളിസിസ്റ്റിക് ഓവറി സിന്‍ഡ്രോം), പാരിസ്ഥിതിക ഘടകങ്ങൾ എന്നിവ അണ്ഡാശയ അർബുദ സാധ്യത വർദ്ധിപ്പിക്കുന്നു. പ്രത്യേകിച്ച് നഗരപ്രദേശങ്ങളിൽ സ്ത്രീകളിൽ അധികവണ്ണം കൂടുതലാണ്. ശരീരത്തിലെ കൊഴുപ്പ് ഈസ്ട്രജൻ ഉൽപാദനത്തെ കൂട്ടുകയും ക്യാൻസർ സാധ്യത വർദ്ധിപ്പിക്കുകയും ചെയ്യുന്നു.പ്രസവം വൈകിപ്പിക്കുന്നതും കുട്ടികളില്ലാതെ തുടരുന്നതും അണ്ഡാശയ ക്യാൻസറിനുള്ള സാധ്യത കൂട്ടുന്ന പ്രധാന ഘടകങ്ങളാണ്. ഗർഭധാരണവും മുലയൂട്ടലും അണ്ഡോത്പാദന ചക്രങ്ങളെ കുറയ്ക്കുകയും, ഈസ്ട്രജൻ ഉത്തേജനത്തിന്റെ ദൈർഘ്യം കുറയ്ക്കുകയും ചെയ്യുന്നു, ഇതിലൂടെ ക്യാൻസർ സാധ്യത കുറയുന്നു.

ലക്ഷണങ്ങൾ എന്തെല്ലാം ?

അടിവയറ്റിൽ മുഴ പോലെ കാണുക

എപ്പോഴും വയറു വീർത്തിരിക്കുന്നത് തോന്നുക

വയറുവേദന

വിശപ്പില്ലായ്മ

മലവിസർജ്ജന ശീലങ്ങളിലെ മാറ്റങ്ങൾ

ഇടവിട്ട് കൂടുതലായി മൂത്രം ഒഴിക്കുക

എപ്പോഴും ക്ഷീണം തോന്നുക

ഭാരം കുറയുക

പ്രതിരോധ മാർഗങ്ങൾ

ആരോഗ്യകരമായ ജീവിതശൈലി പിന്തുടരുക. പുകയില, മദ്യം, അള്‍ട്രാവയലറ്റ് രശ്മികളിൽ നിന്ന് അകലം പാലിക്കുക. പതിവ് വ്യായാമം ചെയ്യുക, സന്തുലിതമായ പോഷകാഹാരക്രമം നിലനിർത്തുക. ഇത് അണ്ഡാശയ അർബുദം മാത്രമല്ല, മറ്റു പല രോഗങ്ങളുടെയും സാധ്യത കുറയ്ക്കാൻ സഹായിക്കുന്നു.