ഹെൽത്ത് ഡെസ്ക്:നിത്യജീവിതത്തിൽ പലരും അറിയാതെ തന്നെ അമിത അളവിൽ ഉപ്പ് ഉപയോഗിക്കുന്ന ശീലത്തിലേക്ക് മാറിയിരിക്കുകയാണ്. ചോറിനൊപ്പം അധികമായി ഉപ്പ് ചേർക്കുക, ചോറു വാർക്കുമ്പോൾ പോലും ഉപ്പ് ഉപയോഗിക്കുക തുടങ്ങിയ ശീലങ്ങൾ വർഷങ്ങളായി പലരിലും തുടരുന്നു. ചിപ്സ്, കോൺഫ്ളേക്സ് പോലുള്ള പ്രോസസ്ഡ് ഭക്ഷണങ്ങളിലും ഉപ്പ് വലിയ അളവിൽ അടങ്ങിയിട്ടുണ്ട്. അച്ചാർ ഉൾപ്പെടെയുള്ള ഭക്ഷണവസ്തുക്കളിൽ പ്രിസർവേറ്റീവായും ഉപ്പ് വ്യാപകമായി ഉപയോഗിക്കുന്നുണ്ട്.
ബിപി കൂട്ടുന്ന സോഡിയം
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ശരീരത്തിലെ സോഡിയത്തിന്റെ അളവ് നിയന്ത്രിക്കുന്നതിൽ പ്രധാന പങ്ക് വഹിക്കുന്നത് പൊട്ടാസ്യമാണ്. പച്ചക്കറികളും പഴവർഗങ്ങളും പൊട്ടാസ്യത്തിന്റെ പ്രധാന ഉറവിടങ്ങളാണ്. എന്നാൽ, പച്ചക്കറികൾ ഒഴിവാക്കി പ്രോസസ്ഡ് ഫുഡ്സ് ശീലമാക്കുന്നവരാണ് ഇന്ന് പലരും. ഇത്തരത്തിൽ പച്ചക്കറികൾ കഴിക്കാത്തവർ അമിതമായി ഉപ്പ് ഉപയോഗിക്കുമ്പോൾ ശരീരത്തിലെ സോഡിയത്തിന്റെ അളവ് ക്രമാതീതമായി ഉയരുന്നു.സോഡിയം ശരീരത്തിൽ വെള്ളം പിടിച്ചുനിർത്തുന്ന സ്വഭാവമുള്ളതാണ്. ഇതോടെ രക്തത്തിലെ വെള്ളത്തിന്റെ അളവ് വർധിക്കുകയും രക്തത്തിന്റെ വ്യാപ്തം കൂടുകയും ചെയ്യുന്നു. ഇതിന്റെ ഫലമായി രക്തസമ്മർദം (ബിപി) ഉയരാൻ ഇടയാകുന്നു.
ഉപ്പും കൊളസ്ട്രോളും
ഉപ്പും കൊളസ്ട്രോളും തമ്മിൽ നേരിട്ടുള്ള ബന്ധമില്ല. ശരീരത്തിൽ സ്വാഭാവികമായി ഉത്പാദിപ്പിക്കപ്പെടുന്നതിന് പുറമേ, നാം കഴിക്കുന്ന ഭക്ഷണത്തിലൂടെയാണ് കൊളസ്ട്രോൾ കൂടുതലായി ശരീരത്തിലെത്തുന്നത്. എന്നാൽ, ബിപിയുള്ളവരിൽ പലപ്പോഴും കൊളസ്ട്രോൾ കൂടുതലായി കാണപ്പെടുന്നതായും ആരോഗ്യ വിദഗ്ധർ പറയുന്നു.
സ്ത്രീകളിൽ വർധിച്ച് സ്ട്രോക്ക് സാധ്യത
സർവേ റിപ്പോർട്ടുകൾ പ്രകാരം, സ്ട്രോക്ക് ഇപ്പോൾ പുരുഷന്മാരേക്കാൾ സ്ത്രീകളിലാണ് കൂടുതലായി റിപ്പോർട്ട് ചെയ്യപ്പെടുന്നത്. അമിതമായ മാനസിക സമ്മർദം, നിയന്ത്രിതമല്ലാത്ത രക്തസമ്മർദം, അമിതവണ്ണം, മരുന്നുകൾ കൃത്യസമയത്ത് കഴിക്കാത്ത അവസ്ഥ എന്നിവ സ്ത്രീകളിൽ സ്ട്രോക്ക് സാധ്യത വർധിപ്പിക്കുന്ന പ്രധാന ഘടകങ്ങളായി മാറിയിട്ടുണ്ട്.ഉപ്പ് അധികമായി ഉപയോഗിക്കുന്നതിലൂടെ ബിപി ഉയരുകയും, ബിപിയും സ്ട്രോക്കും തമ്മിലുള്ള ബന്ധം ശക്തമാകുകയും ചെയ്യുന്നതിനാൽ ഉപ്പ് മിതമായി മാത്രം ഉപയോഗിക്കണമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു.
ഉണക്കമീൻ പതിവാക്കരുത്
ഉണക്കമീൻ പതിവായി കഴിക്കുന്നവരിൽ ആമാശയ സംബന്ധമായ ആരോഗ്യ പ്രശ്നങ്ങൾ, പ്രത്യേകിച്ച് കാൻസറിനു മുന്നോടിയായുള്ള ലക്ഷണങ്ങൾ കണ്ടുവരുന്നതായി പഠനങ്ങൾ സൂചിപ്പിക്കുന്നു. ഉണക്കമീനിൽ ഉപ്പിന്റെ അംശം വളരെ കൂടുതലായതിനാൽ ഇത് സ്ഥിരമായി ഭക്ഷണത്തിൽ ഉൾപ്പെടുത്തുന്നത് ആരോഗ്യത്തിന് ഹാനികരമാണെന്നും ഡോക്ടർമാർ പറയുന്നു.