ശരീരത്തിലെ ഏറ്റവും അഴുക്കുള്ള ഭാഗം പൊക്കിള്‍; വൃത്തിയില്ലെങ്കിൽ ഗുരുതര ആരോഗ്യപ്രശ്നങ്ങൾ

ഹെൽത്ത്‌ ഡെസ്ക്:മനുഷ്യ ശരീരത്തിലെ ഏറ്റവും അഴുക്ക് അടിഞ്ഞുകൂടുന്ന ഭാഗങ്ങളിൽ ഒന്നാണ് പൊക്കിള്‍ എന്ന് ഡോക്ടർമാർ മുന്നറിയിപ്പ് നൽകുന്നു. കുളിക്കുമ്പോൾ പോലും പലരും വൃത്തിയാക്കാൻ മറക്കുന്ന ഈ ഭാഗത്ത് വിയർപ്പ്, പൊടി, മൃതകോശങ്ങൾ, എണ്ണ, തുണിനാരുകൾ എന്നിവ അടിഞ്ഞുകൂടാൻ ഏറെ സാധ്യതയുണ്ട്. ചർമ്മാരോഗ്യത്തിന്റെ കാര്യത്തിൽ പൊക്കിളിന് പ്രത്യേക പ്രാധാന്യമുണ്ടെന്നും അവഗണന ഗുരുതര ആരോഗ്യപ്രശ്നങ്ങളിലേക്ക് നയിക്കാമെന്നും വിദഗ്ധർ പറയുന്നു.പുറത്തേക്ക് ഉന്തിയ പൊക്കിളിനെ അപേക്ഷിച്ച് ഉള്ളിലേക്ക് കുഴിഞ്ഞ പൊക്കിളുള്ളവരിലാണ് അഴുക്ക് കൂടുതൽ അടിഞ്ഞുകൂടുന്നത്. ഇത്തരം സാഹചര്യങ്ങളിൽ ബാക്ടീരിയകളും ഫംഗസുകളും വേഗത്തിൽ വളരാൻ സാധ്യതയുണ്ടാകുകയും ബാക്ടീരിയൽ അണുബാധകൾ ഉണ്ടാകുകയും ചെയ്യും.

പൊക്കിള്‍ വൃത്തിയാക്കാത്തവരിൽ ഇ-കോലി ഉൾപ്പെടെയുള്ള ബാക്ടീരിയകൾ മൂലമുള്ള അണുബാധ, യീസ്റ്റ് ഇൻഫെക്ഷൻ, സെബേഷ്യസ് സിസ്റ്റുകൾ എന്നിവ കണ്ടുവരുന്നുണ്ടെന്ന് ഡോക്ടർമാർ വ്യക്തമാക്കുന്നു.പൊക്കിള്‍ തുളച്ച് ആഭരണങ്ങൾ അണിയുന്നവരിൽ അണുബാധയ്ക്കുള്ള സാധ്യത കൂടുതലാണ്. എണ്ണയും വിയർപ്പും ദീർഘകാലം അടിഞ്ഞുകൂടുമ്പോൾ യീസ്റ്റ് ഇൻഫെക്ഷൻ രൂപപ്പെടാനും സാധ്യതയുണ്ട്. കൂടാതെ, മൃതകോശങ്ങളും അഴുക്കും നീണ്ടുനിൽക്കുന്ന അവഗണനയിലൂടെ നാഭിക്കല്ല് (ഓംഫാലോലിത്ത്) രൂപപ്പെടാൻ ഇടയാക്കാം. കല്ലുപോലെ കട്ടിയുള്ള ഈ വസ്തു സാധാരണയായി അപകടകാരിയല്ലെങ്കിലും സ്പർശിക്കുമ്പോൾ അസ്വസ്ഥതയും ചിലപ്പോൾ സ്രവങ്ങളും ഉണ്ടാകാം.

പൊക്കിളിൽ അടിഞ്ഞുകൂടുന്ന അഴുക്ക് മൂലം ദുർഗന്ധം ഉണ്ടാകുന്നതും ഒരു സാധാരണ പ്രശ്നമാണ്. പൊക്കിളിലെ ജീർണ പദാർത്ഥങ്ങളിൽ പ്രവർത്തിക്കുന്ന ബാക്ടീരിയകളും ഫംഗസുകളും മൂലമാണ് ദുർഗന്ധം ഉണ്ടാകുന്നത്. തുടർച്ചയായ ദുർഗന്ധം, ചുവപ്പ് നിറം, വേദന, സ്രവങ്ങൾ എന്നിവ അണുബാധയുടെ ലക്ഷണങ്ങളായി കണക്കാക്കണം. പൊക്കിളിനുള്ളിലോ ചുറ്റുമോ മുഴയോ വീക്കമോ കാണുന്നുവെങ്കിൽ അത് ഹെർണിയ ആയിരിക്കാമെന്നും ഉടൻ വൈദ്യപരിശോധന അനിവാര്യമാണെന്നും വിദഗ്ധർ നിർദേശിക്കുന്നു.പൊക്കിള്‍ വൃത്തിയാക്കുന്നത് ഏറെ ലളിതമാണ്. കോട്ടൺ സ്വാബോ ചെറിയ തുണിയോ ചൂടുവെള്ളത്തിൽ മുക്കി പിഴിഞ്ഞ് ഉള്ളിലേക്ക് കുഴിഞ്ഞ പൊക്കിള്‍ സൂക്ഷ്മമായി വൃത്തിയാക്കാം.

മൈൽഡ് സോപ്പ് ഉപയോഗിച്ച് മൃദുവായി തിരുമ്മി കഴുകാവുന്നതാണ്. കഴുകിയ ശേഷം ഈർപ്പം ഒട്ടും ശേഷിക്കാതെ പൂർണമായി ഉണങ്ങിയെന്ന് ഉറപ്പാക്കണം. ഈർപ്പം നിലനിൽക്കുന്നത് ഫംഗസുകളുടെ വളർച്ചയ്ക്ക് വഴിയൊരുക്കും.പുറത്തേക്ക് ഉന്തിയ പൊക്കിളുള്ളവർ സോപ്പും വെള്ളവും ഉപയോഗിച്ച് നന്നായി തിരുമ്മി കഴുകുകയും പിന്നീട് ശുദ്ധജലം ഉപയോഗിച്ച് കഴുകി മാറ്റുകയും വേണം. ആഴ്ചയിൽ കുറഞ്ഞത് രണ്ടുതവണയെങ്കിലും പൊക്കിള്‍ വൃത്തിയാക്കുന്നത് ആരോഗ്യസംരക്ഷണത്തിന് അനിവാര്യമാണെന്ന് ഡോക്ടർമാർ ഓർമ്മിപ്പിക്കുന്നു.