ന്യൂസ് ഡെസ്ക്: തലമുറകളായി കൈമാറി വരുന്ന ഒരു പരമ്പരാഗത ശീലമാണ് രാത്രി സമയങ്ങളിൽ തലയിൽ എണ്ണ തേയ്ക്കുന്നത്. മുടിയുടെ വളർച്ചയും ആരോഗ്യവും ലക്ഷ്യമിടുന്നവർക്കായി രാത്രി എണ്ണമസാജ് കൂടുതൽ ഗുണകരമാണെന്ന് ആരോഗ്യ വിദഗ്ധർ പറയുന്നു.രാത്രിയിൽ തലയിൽ എണ്ണ തേയ്ക്കുമ്പോൾ എണ്ണയിലെ പോഷകങ്ങൾ തലയോട്ടിയിലേക്ക് ആഴ്ന്നിറങ്ങാൻ ആറുമുതൽ എട്ട് മണിക്കൂർ വരെ സമയം ലഭിക്കുന്നു. ശരീരം വിശ്രമാവസ്ഥയിലായിരിക്കുന്ന ഈ സമയത്ത് രക്തചംക്രമണം മെച്ചപ്പെടുകയും സമ്മർദ്ദ ഹോർമോണുകളുടെ അളവ് കുറയുകയും ചെയ്യുന്നതായും വിദഗ്ധർ ചൂണ്ടിക്കാട്ടുന്നു.
ഇതുവഴി തലയോട്ടി പോഷകങ്ങളെ കൂടുതൽ ഫലപ്രദമായി സ്വീകരിക്കാൻ കഴിയും.ഉറങ്ങുന്നതിനുമുമ്പ് നൽകുന്ന മൃദുവായ തലമസാജ് നല്ല ഉറക്കത്തിനും മാനസിക സമ്മർദ്ദം കുറയുന്നതിനും സഹായകമാണ്. സമ്മർദ്ദം കുറയുന്നതോടെ മുടികൊഴിച്ചിൽ കുറയാനും അകാലനര ഉണ്ടാകാനുള്ള സാധ്യത കുറയാനും സഹായിക്കുമെന്ന് വിലയിരുത്തപ്പെടുന്നു.വരണ്ട തലയോട്ടി മൂലം മുടികൊഴിച്ചിൽ അനുഭവപ്പെടുന്നവർക്കാണ് രാത്രി എണ്ണ തേയ്ക്കുന്നത് കൂടുതൽ ഗുണം ചെയ്യുന്നത്. തേങ്ങെണ്ണ, എള്ളെണ്ണ, ഭൃംഗരാജ് എണ്ണ, അല്ലെങ്കിൽ ഇളം എണ്ണയുമായി കലർത്തിയ ആവണക്കെണ്ണ എന്നിവ ഉപയോഗിക്കുന്നത് ഉചിതമാണെന്നാണ് നിർദേശം.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
എന്നാൽ, ഉറങ്ങുന്നതിനിടെ മുടി കർശനമായി കെട്ടിവയ്ക്കുന്നത് മുടികൊഴിച്ചിലിന് കാരണമാകുമെന്ന മുന്നറിയിപ്പും ഉണ്ട്.അതേസമയം, ഈ രീതി എല്ലാവർക്കും ഒരുപോലെ അനുയോജ്യമല്ല. ചിലരിൽ തലയിൽ ചൊറിച്ചിൽ, തലവേദന തുടങ്ങിയ പ്രശ്നങ്ങൾ ഉണ്ടാകാൻ സാധ്യതയുണ്ട്. പ്രത്യേകിച്ച് തലയിൽ നീരിറക്കം ഉണ്ടാകാൻ സാധ്യതയുള്ളവർക്ക് പനി, ജലദോഷം തുടങ്ങിയ അസ്വസ്ഥതകൾക്കും ഇത് കാരണമാകാമെന്ന് ആരോഗ്യ വിദഗ്ധർ പറയുന്നു.പകൽ സമയങ്ങളിൽ തലയിൽ എണ്ണ തേയ്ക്കുന്നവർ പലരും ഉടൻ കുളിക്കുന്നതിനാൽ എണ്ണയ്ക്ക് തലയോട്ടിയിൽ പ്രവർത്തിക്കാൻ ആവശ്യമായ സമയം ലഭിക്കാറില്ല. കൂടാതെ കുളിച്ചതിന് ശേഷവും തലമുടിയിൽ എണ്ണയുടെ അംശം തുടരുകയാണെങ്കിൽ, അന്തരീക്ഷത്തിലെ പൊടിയും മലിനതകളും മുടിയിൽ ഒട്ടിപ്പിടിക്കാൻ സാധ്യതയുണ്ട്. പകൽ സമയങ്ങളിൽ യാത്ര കൂടുതലായതിനാൽ ഈ പ്രശ്നം കൂടുതൽ രൂക്ഷമാകുമെന്നും വിദഗ്ധർ മുന്നറിയിപ്പ് നൽകുന്നു.